Ռաֆիկ նիֆչյոմ նէ վինավա՛տ...»․ վերլուծական

7or.am-ը գրում է․

Այն, որ Ազգային ժողովի այսպես կոչված՝ «քննիչ հանձնաժողովում» Նիկոլ Փաշինյանի ելույթն ընդամենը շոու է լինելու, պարզ էր ի սկզբանե, ինչպես ասվում է՝ «էն գլխից»: Ողջունելի է, որ ԱԺ երկու ընդդիմադիր խմբակցությունները՝ «Հայաստան» և «Պատիվ ունեմ», համատեղ հայտարարեցին, որ դույզն-ինչ ցանկություն չունեն այդ շոուին ներկա գտնվելու և/կամ մասնակցելու:

Ամենից առաջ, ԱԺ «քննիչ հանձնաժողով» ասվածի առանցքային նպատակը ոչ թե 2020-ի սեպտեմբերի 27-ից նոյեմբերի 9-ը տևած խայտառակ ու աղետային պատերազմի պատճառները պարզելն ու վերհանելն է, այլ այդ պատերազմի հետ կապված Նիկոլ Փաշինյանի իշխանության, այսինքն՝ իրենց իսկ մեղքերը պարտակելը:

Գործնականում նույն նպատակն էր հետապնդում նաև Նիկոլ Փաշինյանի մասնակցությունը տվյալ «հանձնաժողովի» այսօրվա նիստին ու, եթե կարելի է այդպես ասել՝ նրա «հարցաքննությունը», դա ուղիղ եթերով հեռարձակելը:

Ուղիղ եթերի պարագան ի սկզբանե հուշում էր, որ այնտեղ չի կարող որևէ լուրջ հարց կամ փաստ արծարծվել, այլ ընդամենը լինելու է փաշինյանական լոգորեայի հերթական դրսևորում: Եվ այսօրվա նրա ելույթը մեկին՝ մեկ ապացուցեց այդ կանխահեսումների ճշգրտությունը:

Փաշինյանի «հարցաքննության» հիմնական «կոնցեպտուալ» կետերը հետևյալն են. ա) Արցախը դեռ նախքան իր իշխանության գալն էր «տված», հնարավոր է, նույնիսկ, դեռ նախքան մեր թվարկության սկիզբն էր տրված, բ) բայց ինչ էլ ինքն աներ, միևնույն է, արդյունքն այն էր լինելու, գ) գնացեք, որտեղ ուզում եք՝ մեղավորներ փնտրեք, բայց Փաշինյանին մոտ չգաք, դ) Նիկոլ Փաշինյանը ամենահայրենասեր անձնավորությունն է գալակտիկայում, ե) և այդպես շարունակ:

Կարճ ասած՝ «Ռաֆիկ նիֆչյոմ նէ վինավա՛տ...»:

Փաշինյանի հրահրած պատերազմի համար մեղավոր են նախկին նախագահները, մեղավոր են զինվորականները, գեներալները, հենց Արցա՛խն է մեղավոր: Մեղավոր են Ռուսաստանն ու Մինսկի խումբը, մեղավոր են բոլորը, մեղավոր է՝ ով ասես, միայն ոչ՝ Նիկոլ Փաշինյանն ու նրա գլխավորած պոպուլիստ-պարգևավճարյալների անձեռնահաս «թիմը»:

Բայց մի քանի այլ շեշտադրումներ էլ կան:

Առաջինը. ոչ այլ ոք, այլ հենց անձամբ Նիկոլ Փաշինյանն է հայտարարել, որ ինքը Արցախի հարցով բանակցություններ սկսելու է և սկսել է ի՛ր կետից, «զրոյական կետից»: Հետևաբար, հիմա նա ո՞ւմ է ուզում էշի տեղ դնել: Դու քո՛ կետերից խոսիր, ի՞նչ ես կախ-կախ լինում նախկին նախագահների քաղաքական ժառանգության փեշերից:

Երկրորդը. ոչ այլ ոք, այլ հենց Նիկոլ Փաշինյանն է «վերելակային» պայմանավորվածություններ կայացրել Ալիևի հետ, Նիկոլ Փաշինյա՛նն է նրանից միջնորդավորված ծրար ստացել՝ որոշակի առաջարկներով ու ընդունել այդ ծրարը: Հիմա դու ումի՞ց ես ինչ բողոքում:

Երրորդը. ոչ այլ ոք, այլ հենց Նիկոլ Փաշինյանն է հայտարարել, որ «ինչ ուզում, էն էլ բանակցում ենք»: Հիմա ի՞նչ ես փրփրաբերան, ձեռքերդ փրփուրների նետում, թե որ թվականին ով ինչ է բանակցել:

Չորրորդը. ոչ այլ ոք, այլ հենց Նիկոլ Փաշինյանն է Արցախում, Ստեփանակերտի Վերածննդի հրապարակում հայտարարել, որ «Արցախը Հայաստան է, և վերջ»: Նա դա արել է միտումնավոր, հատուկ այն նպատակով, որ լեգիտիմացնի ադրբեջանական ու թուրքական կողմերի՝ ռազմական ագրեսիայի միջոցով խնդիրը լուծելու մշտական մղումները:

Նիկոլ Փաշինյա՛նը, այլ ոչ թե Ալֆացենտավրայից եկած այլմոլորակայիններն են տորպեդահարել բանակցային գործընթացը, այն մղել պատերազմական փուլ ու պատերազմի ընթացքում հետևողականորեն արել ամեն ինչ Հայաստանն ու Արցախը պարտության մատնելու համար:

Փաստը մնում է փաստ. Նիկոլ Փաշինյա՛նն է ՀՀ միակ ղեկավարը, ով Արցախը ճանաչել է ադրբեջանական:

Նիկոլ Փաշինյանը, բնականաբար, դեռ էլի է խոսելու և խոսելու: Թեպետ, նա ճիշտ կանի, որ նախապատրաստվի իր վաստակածին՝ ինչպես ինքն է սիրում ասել՝ «գնդակահարության պատի տակ կանգնելուն»: Դատարանում:

Ինչ վերաբերում է նրան հարցաքննելուն, ապա մի օր իսկակական հարցաքննության ժամն էլ կգա, չնայած, դա արդեն էական չէ: Էական է, որ Նիկոլ Փաշինյանի իշխանության վերջը գա: Որքան՝ շուտ, այնքան՝ լավ:

Արմեն Հակոբյան