Կա ընդամենը մեկ սուբյեկտ, որի դեմ խաղ չկա, ժողովուրդը. Հայկ Մարությանի պարզաբանումը

Երևանի ավագանու «Իմ քայլը» դաշինքի թեկնածու, «Քաղաքացիական պայմանագիր» կուսակցության քաղաքապետի թեկնածու Հայկ Մարությանը ֆեյսբուքյան իր էջում պարզաբանել է երեկվա իր ելույթում հնչեցրած մտքերը, որոնք սոցիալական ցանցերում լայն տարածում են գտել և քննադատության արժանացել։

Հիշեցնենք, որ Հայկ Մարությանը հայտարարել էր, որ Հայաստանում իրավիճակը շատ պարզ է, կան սպիտակ ուժեր և կան սև ուժեր։ «Մեր թիմի դեմը խաղ չկա»,- ասել էր նա։

Քաղաքապետի ՔՊ թեկնածուն պարզաբանել է․ «Սիրելի ժողովուրդ, այսօր համացանցում քննարկման առարկա են դարձել ելույթումս հնչեցված որոշ ձևակերպումներ, որոնք տարաբնույթ մեկնաբանությունների առիթ են հանդիսացել։ Ես ամենևին անթերի չեմ, և կարծում եմ, որ կարող էի ավելի հստակ ձևակերպել խոսքս, և, գուցե, այդ դեպքում տարընթերցումներ չլինեին։

Ուզում եմ հստակ ֆիքսել, որ Հայաստանում կա ընդամենը մեկ սուբյեկտ, որի դեմ խաղ չկա, և դա Հայաստանի ժողովուրդն է։Ու, այո, բոլոր այն ուժերը, որոնք տարիներ շարունակ բռնացել են ու դեռ փորձելու են բռնանալ ժողովրդի ազատության և արժանապատվության վրա, խաբել ժողովրդին, կանխել վերջինիս առաջընթացն ու հաջողությունը, սև ուժեր են, և ես անձամբ իմ պարտքն եմ համարել և համարում անել ամեն ինչ, որպեսզի նրանք այլևս երբեք չկարողանան դա անել։ Ընտրությունը ժողովրդինն է, և ես համոզված եմ, որ մեր թիմը կարժանանա վերջինիս վստահությանը»։