ՌԴ ԱԳՆ-ն ՝ Հայաստանում ներքաղաքական իրավիճակի մասին

Հայաստանում բողոքի ցույցերը  Երևանի ներքին գործն են, մենք  շահագրգռված ենք դաշնակցային Հանրապետության կայուն, խաղաղ եւ անվտանգ զարգացմամբ։  Այս մասին ճեպազրույցի ժամանակ հայտարարել Է ՌԴ ԱԳՆ տեղեկատվության և մամուլի դեպարտամենտի փոխտնօրեն Ալեքսեյ Զայցևը:

"Ելնում ենք նրանից, որ բոլոր ներքաղաքական հարցերը պետք է կարգավորվեն բացառապես իրավական և սահմանադրական դաշտում ՝ համապատասխան ժողովրդավարական ընթացակարգերի շրջանակներում: 

Ինչ վերաբերում է ներկայիս իրադարձությունները հայ-ադրբեջանական կարգավորման գործընթացի հետ կապելուն, ապա ինչպես հասկանում ենք, խոսքը գնում է ոչ թե ձեռք բերված եռակողմ պայմանավորվածությունների հանդեպ ընդդիմության վերաբերմունքի, այլ ՀՀ ղեկավարության այս կամ այն հայտարարությունների ընկալման մասին:

Մենք  հավատարիմ ենք Հայաստանի եւ Ադրբեջանի միջեւ հարաբերությունների կարգավորման ակտիվ աջակցությանը, առաջին հերթին 2020 թվականի նոյեմբերի 9- ի, 2021 թվականի հունվարի 11-ի եւ նոյեմբերի 26-ի եռակողմ հայտարարությունների բոլոր դրույթների իրագործման, ինչպես նաեւ Երեւանի եւ Բաքվի միջեւ խաղաղ համաձայնագրի կնքման միջոցով», - հայտարարել է ՌԴ ԱԳՆ ներկայացուցիչը: