«Կարճ ասած»․ Ի՞նչ են արել այս պաշտոնյաները Հայաստանից զինվոր գողանալուց հետո 40 օր

Սումգայիթի դատարանը 11,5 տարվա ազատազրկման է դատապարտել Հայաստանից առևանգած երկու զինծառայողներին։ Սա միջազգային մակարդակի ցինիզմ է, սա Հայաստանի Հանարապետության նախագահի, վարչապետի, արտգործնախարարի, պաշտպանության նախարարի, գենշտաբի պետի, ԱԽ քարտուղարի ու այլոց ստորացումն է։

Գամ սկզբից։ Մայիսի 27-ի գիշերը պաշտպանության նախարարությունը հաղորդագրություն տարածեց, որ մայիսի 26-ին՝ ժամը 19:00-ից, մարտական դիրքեր սնունդ մատակարարող ՀՀ ԶՈւ 2 զինծառայողի հետ կապն ընդհատվել է: Ընթանում են որոնողական աշխատանքներ: Քննվում է նաև ադրբեջանական կողմում հայտնվելու հնարավոր վարկածը: Նույն օրը տարածեց մեկ այլ հաղորդագրություն, թե՝ միջդիրքային ճանապարհին հայտնաբերվել է այդ զինծառայողների կողմից շահագործվող թիկունքային մատակարարման ավտոմեքենան, որը բեռնված էր սննդով և ջրով՝ նախատեսված մարտական հենակետերի համար: Այնուհետև ադրբեջանական լրատվամիջոցներն ու սահմանապահ ծառայությունը հայտնեցին, թե հայկական կողմը դիվերսիոն ներթափանցման փորձ է կատարել, ձերբակալվել է 2 զինծառայող։ Հաջորդ հայտարարությունը տարածեց Ադրբեջանի դատախազությունը․ հայ զինծառայողներ են ձերբակալվել՝ Ադրբեջանի պետական սահմանը խախտելու, Ադրբեջանի տարածքում ահաբեկչության, զենքի ապօրինի տեղափոխման մեղադրանքներով։ Նրանք էին Հարություն Հովակիմյանը և Կարեն Ղազարյանը։ Հայ զինվորները կատարում էին ծառայակիցներին սնունդ տանելու պարտականությունը, ՀՀ տարածքում, թշնամին նրանց առևանգեց, տարավ ու դատեց։

Անցել է 40 օր։ Որո՞նք են եղել ՀՀ քայլերը այդ օրվանից սկսած։ Հայաստանի իշխանությունը ինչ է արել իր զինվորների համար։ Ուսումնասիրելով պաշտոնական կայքերը՝ հանդիպում ենք ընդամենը մեկ հաղորդագրության․ հենց նույն օրը արտգործնախարարությունը 4 տողանոց հայտարարություն է տարածել, թե՝ Ադրբեջանը ապօրինի առևանգում է արել (չես հասկանում, թե ըստ Արարատ Միրզոյանի, օրինական առևանգումը որն է) և դրանով Ադրբեջանն իր կողմից պարտավորությունների կատարումից շեղվելու փորձ է անում։ Եվ կոչ է անում արձակել բոլոր գերիներին՝ համաձայն նոյեմբերի 9-ի թղթի։ Ուզում եմ շեշտել, որ նրանք գերի չեն, նրանց առևանգել են Հայաստանի տարածքում տեղաշարժվելիս։

Միասին նայենք Հայաստանից 5 պատասխանատու պաշտոնյայի գործողությունները՝ պաշտպանության նախարար, արտաքին գործերի նախարար, ԱԺ նախագահ, վարչապետ, նախագահ։ Ի՞նչ են արել վերջին 40 օրերին, երբ մեր երկրից թշնամին զինվորներ է գողացել։

ՊՆ Սուրեն Պապիկյան․ մայիսի 28-ին այցելել է Սարդարապատ՝ Հանրապետության տոնի առթիվ։ Ընդունել է Ղազախստանի դեսպանին ու շնորհավորել նոր պաշտոնի առիթով, զանգել է ԱՄՆ պաշտպանության քարտուղարի տեղակալին, այցելել է ուսումնական կենտրոն։ Հետո մեկնել է Ֆրանսիա մի քանի օրով, մասնակցել ցուցահանդեսի, հանդիպել է իր ֆրանսիացի գործընկերոջը, Հայաստանի հիմնը երգել և այլն, էլ չթվարկեմ։ Մի բառ չկա, որտեղ Հայաստանի պաշտպանության նախարարը խոսի մեր երկրից գողացված զինվորներից։ Հա, Սուրեն Պապիկյանն այցելել է նաև զինվորական հավաքակայան, նորակոչիկներին ասել՝ ուր են գնում ծառայելու։ Ու վստահաբար չի ասել, որ կարող ա իրենց գողանան, տանեն ու պետությունը թքած ունենա, կներեք բառի համար։

Արտգործնախարար Արարատ Միրզոյան․ հանդիպել է ԵԱՀԿ Մինսկի խմբի համանախագահ Լուիս Բոնոյին: Հանդիպել է Արգենտինայի խորհրդարանական պատվիրակությանը, զանգել-շնորհավորել է Թուրքիայի նորանշանակ արտգործնախարարին, հանդիպել է Բունդեսթագի ինչ-որ հանձնաժողովի նախագահին, հանդիպել է ԵՄ հատուկ ներկայացուցիչ Տոյվո Կլաարին, զանգել է Ավստրիայի, հետո Ֆրանսիայի ԱԳ նախարարին, հանդիպել է ԱՄՆ պետքարտուղարին, և վերջապես հանդիպել է Ադրբեջանի արտաքին գործերի նախարարին ու մի բառ չկա այն մասին, որ խոսել են Հայաստանից առևանգված զինվորներից։ Ժղովորդ, սա աղետ ա։

ԱԺ նախագահը․ գնացել է Լեհաստան, հետո մի քանի օրով Մեծ Բրիտանիա։ Հերիք չէ կնոջն էլ էր Լոնդոն տարել, մի հատ էլ շամպայն էին տրաքացնում, ծնունդ նշում։ Սլովենիայի ԱԺ նախագահին հրավիրել է Հայաստան, ուղերձներ է, որ հղել է՝ էլ Հանրապետության օրվա առթիվ, էլ սահմանադրության առթիվ, էլ երեխաների պաշտպանության օրվա առթիվ, ԱԺ-ում ելույթներ է ուեցել ու ասել, թե ժողովուրդը իրենց է ընտրել, իրենք խաղաղություն են բերում, բայց Հայաստանից առևանգված զինվորների մասին՝ ոչ մի խոսք։

Ի՞նչ է արել Նիկոլ Փաշինյանը էս 40 օրում․ կնոջ հետ գնացել է Օհան Դուրյանի մասին ֆիլմի պրեմիերային, այցելել է դատախազություն, ՊՊԾ, ԱԽ նիստ է արել, զանգել է Պուտինին, Վրաստանի վարչապետի ծնունդն է զանգել-շնորհավորել, հնգակողմ հանդիպում է ունեցել Ալիևի հետ, զանգել է էրդողանին ու շնորհավորել նախագահ ընտրվելու կապակցությամբ, դա համարել է թերի, մի հատ էլ գնացել է Անկարա ու շնորհավորել, Մոլդովայում մասնակցել է համերգի, հետո Էրդողանին մի հատ էլ զանգել-շնորհավորել է Կուրբան Բայրամի առթիվ, գնացել է քննիչ հանձնաժողով, կնոջ հետ այցելել է Վալմարի արվեստի սրահ, մանկապարտեղ է բացել, հերոսների հուշարձանի առաջ ծնկի է եկել, մասնակցել է «Վարչապետի գավաթ» մրցաշարին ու ապրելու կամքից է խոսել, խոսել է ժողովրդավարություն բրենդից, մասնակցել է ԵՏՄ ու ԱՊՀ նիստերի, Վիգեն Խաչատրյանին ուղեկցել է այն աշխարհ, ավտոբուսում փիարվել է, գնացել է պատկերասրահ, բայց ոչինչ չի արել, որ Ադրբեջանը մեզանից գողացած տղերքին վերադարձնի։

ՀՀ նախագահ Վահագն Խաչատուրյան։ Մեդալներ է հանձնել մայիսի 28-ի առթիվ, հանդիպել է Նիկոլ Փաշինյանին, փոքրիկ ստեղծագործողների ցուցահանդես է կազմակերպել, դատավորների է կանչել, երդվել են անաչառ լինել, Այցելել է Ռուսաստանի, ԱՄՆ, Իտալիայի և այլ դեսպանատեր, գնացել է Ղազախստանի դեսպանատուն սգո մատյանում գրառում է արել, բայց չի մասնակցել Եռաբլուրում մեր զոհված տղերքի հուղարկավորությանը, գնացել է Լենինգրադ, հետո՝ Գերմանիա, մեդալներ է, որ շնորհել է աջ ու ձախ, այդ թվում՝ զինված ուժերի գլխավոր շտաբի պետ Էդվարդ Ասրյանին շնորհել է գեներալ-լեյտենանտի զինվորական կոչում, ում քթի տակից զինվոր են առևանգել ու ծպտում չի հանել։ Սա էլ մեր նախագահը։

Լո՞ւրջ։ Էս ա՞ ձեր անելիքը։ Ամեն մեկդ տասը թիկնապահով Երևանի մեջտեղով ման եք գալիս, որ ձեզ բան ասող չլինի, բա օր ու մեջ զինվոր ենք կորցնում, բան չունե՞ք ասելու ու անելու։ Հայաստանի առանցքային 5-6 պաշտոնյաների վերջին 40 օրվա արածները, երբ զինվոր են մեզանից առևանգել, էս ա։ Սրանց էս 40 օրվա արածը մեր 2 զինվորի եղունքի չափ արժեք ունի՞։ Էս ի՞նչ եք դուք անում։ Գերիների, առևանգվածների հարազատներն ահնամբեր սպասում են, որ մի բան կանեք, իրենց զավակներին կբերեք։ Սենց ե՞ք հետ բերում։

ՔՊ-ականն ասում է՝ Ադրբեջանը սպասում է, որ Հայաստանի ընդդիմությունը մի քայլ անի ու պատերազմ սկսեն։ ՔՊ-ական Գևորգ Պապոյանն ասում է՝ Հայաստանի իշխանությունը հեչ, բանակցություները հեչ, իրենք կամ եղած, կամ չեղած, ընդդիմության քայլերն են կանխորոշում ամեն ինչ։ Բա էլ ինչի՞ համար են ձեր բանակցությունները։ Պապոյան Գևորգ, պատերազմը էս ա։ Երբ քո երկրի մեջից քաղաքացուն գողանում-տանում են ու դատում են ծանր հանցագործության համար, էս ա պատերազմը։ Էն որ առիթով-անառիթ ՀՀ գերբով ու դրոշով շորերը հագնում եք ու գնում միջոցառման, նկարվում ու տարածում որպես մամուլի հաղորդագրություն, զուգահեռ պղծում եք ՀՀ խորհրդանիշները ձեր գործունեությամբ։

Կարճ ասած՝ Փաշինյանն ասում էր՝ հայ գերիները բաքվի բանտերում պայքարում են ՀՀ անկախության համար։ Իմացեք, որ հայ գերիները Բաքվի բանտերում, Սումգայիթի բանտերում ցույց են տալիս ՀՀ ծնկած իշխանության դեմքը։ Ադրբեջանի ղեկավարությունը հայ զինվորներին դատելով՝ ժեստ ուղարկեց խաղաղասեր Հայաստանի իշխանությանը, թե ինչ է սպասվում իրենց ու նաև՝ ՀՀ քաղաքացիներին։ Ժողովուրդ, ձեզանից յուրաքանչյուրին խոստացված ապագան իրականում կարող է լինել այնպես, ինչպես եղավ Սումգայիթի բանտում նստած Հարություն Հովակիմյանի և Կարեն Ղազարյանի հետ։ Սումգայիթ անունն էլ շատ խորհրդանշական է։ Սա Նիկոլի խոստացած ու բերած ապագան է։

Սևակ Հակոբյան