11 06 2019

46 համարի երթուղայինի կարգազանց վարորդը հեռացվել է աշխատանքից

46 համարի երթուղայինի կարգազանց վարորդը հեռացվել է աշխատանքից

Երևանի 46 համարի երթուղայինի վարորդն ազատվել է աշխատանքից։ Այս մասին ֆեյսբուքյան իր էջում գրել է Երևանի քաղաքապետարանի մամուլի խոսնակ Հակոբ Կարապետյանը։

«Նախօրեին տարածված տեսանյութում 46 համարի երթուղու վարորդի վարքագիծը քննարկելու համար այսօր Երևանի քաղաքապետարանի տրանսպորտի վարչություն է հրավիրվել երթուղին սպասարկող ընկերության ներկայացուցիչը: Քննարկման արդյունքում որոշում է կայացվել կարգազանց վարորդին հեռացնել աշխատանքից»,–գրել է Կարապետյանը:

Նրա տեղեկացմամբ` ուղևորափոխադրող ընկերության ներկայացուցիչներին քաղաքապետարանում հորդորել են աշխատանքներ տանել երթուղու վարորդների հետ՝ խստիվ պահպանել ուղևորների հետ շփման վարքականոնը, ինչպես նաև ավելի ուշադիր լինել ճանապարհային երթևեկության կանոնները պահպանելու հարցում:

Հիշեցնենք, որ հունիսի 10–ին սոցիալական ցանցերում ակտիվորեն տարածվում էր տեսանյութ, որտեղ ուղևորուհին վարորդից պահանջում էր չծխել երթևեկության ժամանակ։ Վերջինս էլ ընդդիմացել էր՝ պահանջելով իջնել երթուղայինից:

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ