26  01  2020

Այսպե՞ս են ղեկավարում պետություն․ այսպես գնում են ոչ մի տեղ․ Նորայր Նորիկյան

Այսպե՞ս են ղեկավարում պետություն․ այսպես գնում են ոչ մի տեղ․ Նորայր Նորիկյան

Փաստաբան Նորայր Նորիկյանը գրում է․

«Պետական, քաղաքական գործչի ու առաջնորդի համար ամենակարևորագույն գործառույթներից մեկը նրա հրապարակային գործունեությունն է և հրապարակային խոսքն ու հաղորդակցումը հանրության հետ:

Իմ պատկերացած պետական գործիչը պետք է օժտված լինի հավասարակշռվածությամբ, զսպվածությամբ, լայնախոհությամբ, այլ կարծիքների նկատմամբ հանդուրժողականությամբ, զինված լինի համբերատարությամբ, ունակ լինի ինչպես հարվածներ հասցնելու, այնպես էլ հարվածներ ընդունելու և սեփական սխալներն ընդունելու կարողությամբ, ձերբազատված լինի մեծամտությունից և սեփական անսխալականության բարդույթից:

Պետական ու քաղաքական գործիչը պետք է հարգանք ունենա սեփական խոսքի նկատմամբ, արժևորի այն, գիտակցի հրապարակային ասված խոսքի արդյունքում հանրության ընալման աստիճանն ու դրա հետևանքները:

Երբ տարիներ առաջ Սերժ Սարգսյանն ասում էր՝ ՛՛Ինչքան ուզենք, էնքան կխփենք՛՛, հարյուր հազարավոր քաղաքացիներ արդարացիորեն դժգոհում էին՝ թե արդյո՞ք սա երկրի ղեկավարի պահվածք ու վարքագիծ է:

Ահա այդպիսի պահվածքն ու վարքագիծն է ժամանակի ընթացքում արժեզրկում պետական, քաղաքական գործչի ու առաջնորդի խոսքը, անլրջացնում նրան, իսկ վերջում՝ մերժում:

Ոմանց թվում է, որ եթե իրենք հաղթել են մեկ անգամ, ուրեմն կհաղթեն մշտապես: Սա մեծագույն մոլորություն է, և այդ ընկալումը դարձել է շատերի գերեզմանափորը:

Պետք է տարրական հարգանք ունենալ հասարակության նկատմամբ և այն վստահության նկատմամբ, որ տվել է այդ հասարակությունը:Ընդհանրապես, երբ խոսքի արժեքը սկսում է ոչնչացվել, աստիճանաբար այն արտաբերողի նկատմամբ լրջությունը սկսում է նվազել, ավելին՝ նվազում է նաև նրա խոսքի լեգետիմությունը:

Այսպե՞ս են ղեկավարում պետություն: Այսպես գնում են ոչ մի տեղ»։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ