Մենք ԼՂ ժողովրդի կողմից մանդատ չենք ստացել՝ իրենց ապագան բանակցելու համար․ Արարատ Միրզոյան

«Կառավարության ղեկավարը բազմաթիվ անգամներ հայտարարել է, որ Ղարաբաղի ժողովուրդն իրեն չի ընտրել ու ինքը չի կարող Ղարաբաղի ժողովրդին ներկայացնել: Հիմա բանակցություններ են տեղի ունենում, Ղարաբաղի ժողովուրդն ու քաղաքական ուժերը հայտարարում են, որ էն, ինչ դրված է օրակարգում, իրենց շահերից չի բխում: Դուք Արցախի ժողովրդից, իշխանություններից լիազորվե՞լ եք իրենց անունից բանակցել իրենց ապագա կարգավիճակի վերաբերյալ»,- ԱԺ-ում քննարկման ժամանակ դիմելով ԱԳ նախարար Արարատ Միրզոյանին՝ հարցրեց «Հայաստան» խմբակցության պատգամավոր Արթուր Խաչատրյանը:

«Մենք ԼՂ ժողովրդի կողմից մանդատ չենք ստացել՝ իրենց ապագան բանակցելու համար, ըստ այդմ, մենք իրավունք չունենք որոշել նրանց կարգավիճակը, մենք այդպիսի հավակնություն չենք ներկայացրել և չենք էլ փորձում այդպիսի բան անել։ Միակ բանը, որ մենք փորձում ենք անել ՀՀ-Ադրբեջան հարաբերությունների կարգավորման գործընթացում, հետևյալն է․ մենք համարում ենք, որ այդ կարգավորումը իրատեսական ու ամբողջական չի կարող լինել, եթե այդ կարգավորման շրջանակներում չի ստեղծվում երկխոսության մի մեխանիզմ, որտեղ ԼՂ ժողովուրդը և պաշտոնական Բաքուն կարող են երկխոսել։ Որևէ մեկը չի ժխտում, որ ԼՂ ժողովրդի անվտանգության և իրավունքների հետ կապված կան բազմաթիվ հարցեր, դրա մասին են վկայում բլոկադան, Լաչինի միջանցքի ապօրինի արգելափակումն ու այլ հարցեր։ Դրանք պետք է քննարկվեն ու հասցեագրվեն, ո՛չ մեր կողմից, այլ ԼՂ ժողովրդի կողմից ընտրված մարմինների ու լիազոր ինստիտուտների կողմից»,- ասաց Արարատ Միրզոյանը։

Արթուր Խաչատրյանն արձագանքեց, թե՝ այդ դեպքում ինչու եք ճանաչում Ադրբեջանի տարածքային ամբողջականությունը՝ ներառյալ Արցախը։

Մանրամասն՝ տեսանյութում։