«Ձեռքներդ հեռո՛ւ ազգի հերոսներից». Աշոտ Մինասյան

Պատմության հազարամյակների փորձը բազմիցս հավաստել է, որ զորեղ և հաստատուն է այն պետությունը, որի պահապանները զինված են ազգային արժանապատվության բարձր գիտակցությամբ:

Արցախյան ազատագրական երեք պատերազմները ևս մեկ անգամ ցույց տվեցին, որ հայ ժողովուրդը միշտ էլ ծնել է և ծնում է հերոսներ, որոնք ի զորու են հանուն Հայրենիքի կերտել հաղթանակներ՝ անգամ կյանքի գնով:

Ընդհանրապես, պետականության հենարանը այն մարդիկ են, ովքեր ապրելը, աշխատելը ընկալում են որպես ծառայություն Հայրենիքին:

Նրանք պարզապես ձգտում են խղճով կատարել իրենց առջև դրված խնդիրը, հնարավոր դարձնել անհնարինը, նվիրվել հասարակությանը, երկրին:

Հայաստանի նորօրյա պատմության հերոսները եկան հաստատելու ասվածի ճշմարտացիությունը՝ բարձր պահելով Հայրենիքի զինվորյալի վսեմ կոչումը: Արցախի ազատագրության հերոսամարտին զինվորագրվածները ոչ միայն անհատներ էին, այլև գերդաստաններ:

Հայդուկային խմբերից ձևավորված հաղթական բանակը ծնեց հրամանատարներ, որոնք էլ իրենց հերթին կերտեցին բանակի դիմագիծը: Երեկվա գիտնականը, գրողը, հողի մշակը, բժիշկը դարձան անկոտրում կամքի տեր հմուտ հրամանատարներ:

Պարտքի և նվիրումի գիտակցումով ծնված հերոսական գերդաստաններից մեկն էլ Խաչատուրովների ընտանիքն է: Գեներալ-գնդապետ Յուրի Խաչատուրովը, նրա որդին՝ հայրենապաշտ գեներալ-մայոր Գրիգորի Խաչատուրովը և վերջինիս եղբայրը՝ Իգոր Խաչատուրովը, իրենց անցած ճանապարհով նոր փառավոր էջեր են գրել հայոց արդի ռազմական պատմության տարեգրքում:

Երեսուն և ավելի տարիներ պատիվ եմ ունեցել ճանաչելու և մոտիկից շփվելու ազգանվեր այս զինվորականների հետ, ինչպես մարտի դաշտում, այնպես էլ պարզ մարդկային հարաբերությունների շրջանակում:

Ասում են թե՝ իբր հերոսներին չեն դատում:

Մինչդեռ Հայաստանի իշխանական աթոռները զավթած խունտան այս ճշմարտությունը ոտնատակ է արել: Խունտայի դավանած «ճշմարտությունը» Հայոց բանակը փոշիացնելն է՝ այն «գլխատելով»:

Շինծու քրեական գործեր հարուցելու միջոցով մեկուսացվեցին փորձառու գրեթե բոլոր հրամանատարները: Խաչատուրով հայրն ու որդիներն էլ հայտնվեցին թիրախում, որովհետև նրանց «մեղքը» Հայրենիքին անմնացորդ նվիրվելն էր և զինվորական երդմանը հավատարիմ մնալը:

Իմ, իմ ծառայակիցների և համակիրների զորակցությունն եմ հայտնում Խաչատուրովներին և բոլորս միաձայն դատապարտում ենք հայրենադավ իշխանությունների հակազգային քաղաքականությունը:

Դիմում ենք կոչով Հայոց բանակի բոլոր ազնիվ գեներալներին, սպաներին, վետերաններին, շարքայիններին՝ սատարել Խաչատուրովներին և թույլ չտալ իշխանություններին՝ իրականացնել իրենց նենգ մտադրությունները:

Ձեռքներդ հեռո՛ւ ազգի հերոսներից։

Սիսական ջոկատի հրամանատար՝ պահեստազորի գնդապետ Աշոտ Մինասյան