ՌԴ ԱԳՆ-ն տարակուսանքով է ընդունել Զատուլինի ՝ Հայաստան մուտք գործելու արգելքը․ Զախարովա

ՌԴ  ԱԳՆ-ն տարակուսանքով է ընդունել  ՌԴ Պետդումայի պատգամավոր Կոնստանտին Զատուլինի ՝ Հայաստան մուտք գործելու արգելքը։

Այդ մասին ճեպազրույցի ժամանակ  ասել է ՌԴ ԱԳՆ պաշտոնական ներկայացուցիչ Մարիա Զախարովան։

Ըստ Մարիա Զախարովայի՝  ՌԴ ԱԳՆ-ն մեկնաբանությունների համար դիմել է ՀՀ ԱԳՆ-ին:

«Մենք պաշտոնապես խնդրել ենք պարզաբանել, թե ինչի հետ է կապված այդ ամենը։  Մենք ելնում ենք նրանից, որ այդ տեղեկատվության հաստատման դեպքում դժվար է այն որակել որպես բարեկամական քայլ, որը համապատասխանում է մեր հարաբերությունների դաշնակցային բնույթին», - նշել է Զախարովան։

«Պաշտոնական պատասխան ստանալուց հետո ռուսական կողմը կորոշի՝ իչպիսին կլինեն  իր ապագա գործողություններն ու արձագանքները»,- հավելել  է  նա:

Հիշեցնենք, որ հոկտեմբերի 25-ին ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի առաջին փոխնախագահ Կոնստանտին Զատուլինը հայտնել էր, որ իրեն «անցանկալի անձ»  են ճանաչել Հայաստանում։  Նա նման որոշումը համարեց վիրավորական քայլ և իր թելեգրամայն ալիքում հրապարակեց ՀՀ ԱԺ արտաքին կապերի վարչության պետից ստացված համապատասխան էլեկտրոնային նամակը։