ԲԴԽ հեղինակությանը և 2021 ընտրությունների լեգիտիմությանը հասցվել է անդառնալի վնաս․ Արամ Վարդևանյան

ԱԺ «Հայաստան» խմբակցության պատգամավոր Արամ Վարդևանյանը ֆեյսբուքյան գրառում է արել, որում ասվում է․

«Իրավական տեսանկյունից կան մի քանի անհերքելի ելակետեր ԲԴԽ-Ջհանգիրյան ստեղծված իրավիճակի վերաբերյալ: Ունենալով մի շարք սուբյեկտիվ դիտարկումներ, սահմանափակվենք օբյեկտիվով.

1) Քրեական հետապնդում պետք է հարուցվի Գագիկ Ջհանգիրյանի նկատմամբ,

2) Գագիկ Ջհանգիրյանը չի կարող մասնակցել Ռուբեն Վարդազարյանի նկատմամբ կարգապահական վարույթի քննությանը, այդ թվում որոշում ընդունելու մասով: Հաշվի առնելով առաջին հանգամանքը, Ջհանգիրյանի լիազորությունները անխուսափելիորեն պետք է կասեցվեն և դա տարածվելու է բոլոր վարույթների վրա:

3) Դատական համակարգի հատկապես ԲԴԽ հեղինակությանը ու 2021 ընտրությունների լեգիտիմությանը հասցվել է անդառնալի վնաս»:

Հիշեցնենք, որ ԲԴԽ՝ լիազորությունները կասեցված Ռուբեն Վարդազարյանը երեկ հրավիրված մամուլի ասուլիսի ժամանակ հայտարարել էր, որ անցած տարի իրեն առաջարկել են հրաժարական տալ, ինչի դիմաց խոստացել են քրեական գործ չհարուցել, ինչին ինքը չի համաձայնել։ Նա նաև հրապարակել էր ԲԴԽ նախագահի պաշտոնակատար Գագիկ Ջհանգիրյանի և ԲԴԽ անդամ Ստեփան Միքայելյանի՝ 2021 թվականի փետրվարի 20-ին տեղի ունեցած զրույցի ձայնագրությունը։ ՀՀ գլխավոր դատախազությունն անդրադարձել է թեմային՝ հայտարարելով, որ ձայնագրությունն ուղարկվել է ՀՀ քննչական կոմիտե։