Քննվում է Ռոբերտ Քոչարյանի գործով դատավորին ինքնաբացարկի հարցը

ՀՀ վերաքննիչ քրեական դատարանը նոյեմբերի 28-ի կեսօրից շարունակում էր երկրորդ նախագահ Ռոբերտ Քոչարյանի խափանման միջոցի վերաբերյալ գործի քննությունը։

Գործն ընդմիջվեց, և ինչպես տեղեկացրեց փաստաբան Հայկ Ալումյանը, դեռևս քննարկման թեման դատավորին ինքնաբացարկի հայտնում էր, քանի որ դատարանը կազմվել է օրենքի խախտումներով։ 

Նիստը մեկնարկել էր նոյեմբերի 27-ին։ Ռոբերտ Քոչարյանի փաստաբանական թիմը ինքնաբացարկ էր հայտնել դատավոր Ռուբեն Մխիթարյանին։ Նիստն ընդմիջվել էր մեկ ժամով, սակայն հատկացված ժամանակը բավարար չի եղել միջնորդությունը կազմելու համար։ Նիստը հետաձգվեց մինչև նոյեմբերի 28-ը։ Լրագրողների հետ զրույցում փաստաբան Հայկ Ալումյանը չմանրամասնեց ինքնաբացարկի պատճառը, միայն ասաց, որ ունեն մի քանի հիմք։

Դատական նիստին մասնակցում էր 6 դատախազ, ինչն աննախադեպ երևույթ է դատական պրակտիկայում։ Հարցին, թե արդյո՞ք չէր կաշկանդում այդքան դատախազի, որոնց թվում՝ գլխավոր դատախազի մասնակցությունը, փաստաբան Ալումյանն ասաց, որ ոչ։ «Դատախազությունից ամենաակտիվը գլխավոր դատախազն էր»,- ասաց Ալումյանը՝ հավելելով․ «Թեև մի դատախազին մրցակից ունենալն ավելի հեշտ է, քան վեց դատախազ, որից մեկը գլխավոր դատախազն է»։