03 06 2021

Տնտեսական անկման նախնական 7.6 %-ը վերանայվել և հասցվել է 7.4%-ի. Մարտին Գալստյան

Տնտեսական անկման նախնական 7.6 %-ը վերանայվել և հասցվել է 7.4%-ի. Մարտին Գալստյան

«2020 թ. չափազանց ծանր տարի էր ինչպես մեր համար, այնպես էլ՝ ֆինանսական համակարգի, բայց, ի պատիվ վերջինիս, ապահովել է ֆինանսական միջնորդության անխափան ընթացքը՝ պահպանելով ռիսկերի կլանման ունակությունը»,- հերթական ասուլիսում հայտնեց ԿԲ նախագահ Մարտին Գալստյանը

Նա պարզաբանեց, որ համակարգը կապիտալիզացված էր և իրացվելի, որի ժամանակ ԿԲ-ն օժանդակության ծրագրեր է իրականացրել, ինչի արդյունաքում հնարավոր է եղել 2020 թիվը բնականոն անցնել :

Նրա խոսքով՝ նախորդ տարվա սկզբից տնտեսությունը կրել է համավարակի և ռազմական դրության բացասական ազդեցությունները, որի արդյունքում գրանցվել է 7.4% տնտեսական անկում:

«Այս ցուցանիշը վերանայվել է, քանի որ Վիճակագրական կոմիտեի նախնական գնահատականներով անկումը սկզբից 7.6 % էր, իսկ այն պայմանավորված է եղել ծառայությունների 9.2% և շինարարության ճյուղի 6.6 % անկմամբ»,- նկատեց ԿԲ նախագահը և հավելեց, որ դրսևորված շոկերը մեծ դժվարություններ են ստեղծել ֆինանսական համակարգի համար:

Ըստ Գալստյանի՝ ԿԲ-ն Սահմանադրությամբ ամրագրված լիազորությունների շրջանակներում ֆինանսական միջնորդությամբ ապահովել է կայունություն, որն իրականացվում է ֆինանսական միջնորդության անընդհատության միջոցով:

Այդ նպատակով, ըստ բանախոսի, անդրադարձել է եղել երկու խումբ հարցերի՝ վարկային ռիսկի աճին, որը բնական համարեց, և երկրորդը՝  իրացվելիության ճնշումներին: 

«Առաջին խնդիրը լուծելու համար մենք հակացիկլիկ միջոցառումներ իրականացրեցինք, որպեսզի օժանդակենք համակարգին, իսկ երկրորդի դեպքում որոշակի իրացվելիության ներարկում կատարեցինք»,- հայտնեց գլխավոր դրամատան ղեկավարը:

Նա տեղեկացրեց, որ ԿԲ-ն իրականացրել է նաև ընթացիկ զարգացումների օպերատիվ մոնիթորինգ, ռիսկերի վերլուծություն և օպերատիվ կլանման գնահատում, ամենօրյա դիտարկում է իրականացվել առանձին բանկերում, ինչպես նաև կատարվել է կապիտալի զգուշավոր կառավարում:

«Սպառողական վարկերի վատորակ կշիռը զգալիորեն ավելացել է, բիզնես և գյուղատնտեսական վարկերի մասով էլ աճ է նկատվել, իսկ հիպոթեքային վարկերը բարեխղճությամբ վճարվել են»,- հայտարարեց Մարտին Գալստյանը:
 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ