Կլինեն կրճատումներ, աշխատավարձը կբարձրանա․ Ատոմ Ջանջուղազյան

2018-ին համախառն ներդրումներ/ՀՆԱ հարաբերակցությունը կանխատեսվում է, որ կլինի 23,3 տոկոս, իսկ 2019-ի համար կանխատեսումը 23,6 տոկոս է: Այս մասին ԱԺ մշտական հանձնաժողովներում 2019 թվականի բյուջեի քննարկումների ժամանակ նշեց Ֆինանսների նախարարի պաշտոնակատար Ատոմ Ջանջուղազյանը:

Նախարարի պաշտոնակատարի խոսքով՝ 2018-ի համար սպասվում է, որ արտահանում/ՀՆԱ ցուցանիշը կլինի 38,7 տոկոս, իսկ 2019-ին կլինի 41 տոկոս:

Ատոմ Ջանջուղազյանը խոստովանեց, որ պետական կառավարման համակարգն ուռճացված է, կլինեն կրճատումներ: Միաժամանակ, նա հավելեց, որ դա միանշանակ կհանգեցնի աշխատավարձերի բարձրացման. «Խոսքը չի վերաբերում փող կրճատելուն, այլ գործառույթները կատարվող աշխատանքին համապատասխանեցնելուն: Այդ դեպքում կունենանք լավ արդյունք: Օրինակ Ֆինանսների նախարարությունում 3,6 մարդուց մեկը ղեկավար է: Սա ամենաարդյունավետ կառավարման եղանակը չէ: Ղեկավարը գին ունի: Եթե 8-9-ից մեկը ղեկավար լինի, մենք մոտ 20 տոկոսով լրացուցիչ վարձատրության տեղ ենք ունենում»,-նշեց ֆինանսների նախարարի պաշտոնակատարը:

Դիմելով Ֆինանսների նախարարի պաշտոնակատար Ատոմ Ջանջուղազյանին՝ ՀՀԿ խմբակցության պատգամավոր Գագիկ Մինասյանը նշեց՝ Կառավարության ծրագրում նշված է, որ հեղափոխությունից հետո դրական սպասումները վերածվելու են ներդրումների հոսքի: 

Մինասյանն ասաց, որ այս տարվա առաջին կիսամյակում կապիտալ ներդրումներն աճել են 76 տոկոսով, տարեկան կտրվածքով կաճեն ընդամենը 37,2 տոկոսով, իսկ 2019-ին աճը կլինի 6,9 տոկոս. «Մասնավոր ներդրումների աճը 2018-ի առաջին կիսամյակում 86,9 տոկոս է, իսկ 2018-ի ողջ տարվա ընթացքում 52 տոկոս: Բաից այդ մասնավոր ներդրումների աճը 2019-ին կկազմի ընդամենը 3 տոկոս: 

2017-ին ՀՆԱ աճը կազմել է 7,5 տոկոս, 2018-ի համար կանխատեսվում է 6,5 տոկոս, իսկ 2019-ի համար՝ 4,9 տոկոս»,-նշեց Գագիկ Մինասյանը՝ ի ցույց դնելով, որ ցուցանիշները գնալով վատանում են, թեեւ կառավարության ծրագրում այլ բան է գրված:

Ի պատասխան պատգամավորի՝  Ատոմ Ջանջուղազյանը նշեց, որ ամեն տարի էլ առաջին կիսամյակում ավելի լավ ցուցանիշներ են լինում, քան տարվերեջին արձանագրված ցուցանիշները. «Երկորդ, որեւէ իրադարձություն չի կարող չունենալ  ժամանակային լագ: Ակնհայտ է, ցանկացած իրադարձության կամ փոփոխության ազդեցություն հենց այդ պահին չեք տեսնում»: Նա նաեւ հավելեց, որ Գագիկ Մինասյանը համադրում է ոչ համադրելի ցուցանիշներ: