Ռեստորաններին անդրադառնալուց երևի մոռանում են հանրային տրանսպորտի վիճակը. Աշոտ Բարսեղյան

Պանդեմիայի պատճառով ամենատուժած ոլորտներից մեկը նաև ռեստորանային ոլորտն է, պետության կողմից տարվող քաղաքականությունն էլ որևէ կերպ չի օգնում վնասները վերականգնելուն: Միայն անցած տարի այդ վնասները կազմում են 300-400 միլիոն: Այս մասին կորոնավիրուսի հետևանքները թեմայով քննարկման ժամանակ ասաց Հայաստանի ռեստորանների միության նախագահ Աշոտ Բարսեղյանը: Նա անդրադարձավ սպասվող նոր սահմանափակումներին, որով առաջարկվում է հանրային սննդի կետեր թողնել միայն պատվաստված քաղաքացիներին: «ՀՀ-ն ուղիղ կախման մեջ է ընկնել ԱՀԿ-ից, ինչ հրահանգում են, այն էլ կատարում են, առանց տեղայնացնելու: Առողջապահության նախարարարությունը զբաղված է ամեն ինչով, բացի առողջապահությունից: Տնտեսության վրա շատ բացասական հետևանքներ է ունենալու այդ որոշումը: Բացի այդ շատ հարցեր են առաջանում՝ մշակված է արդյո՞ք մեխանիզմը, թե ոնց է ի կատար ածվելու այդ որոշումը, ինչպես է վերահսկվելու, վստահ եմ, որ դա չի գործելու»,- ասաց նա: