Ջրի սակագինը կբարձրանա հունվարի 1-ից ․ Գարեգին Բաղրամյան

Հանրային ծառայությունները կարգավորող մարմնի նախագահ Գարեգին Բաղրամյանը, ԱԺ-ում լրագրողների հետ ճեպազրույցում նշեց, որ  ջրի սակագինը կբարձրանա հունվարի 1-ից։  Նրա խոսքով Ջրային կոմիտեի հետ քննարկում  է  «Վեոլիա» ընկերության հետ երկարաժամկետ գնային քաղաքականություն ունենալու հնարավորությունը։

«Նախատեսում է  վարձակալության պայմանագրում այնպիսի փոփոխություններ անել, որ առաջիկա 10 տարվա համար ունենանք կայուն գնային քաղաքականություն։  Դա ենթադրում է սակագնի որոշակի բարձրացում, որը 10 տարվա ընթացքում կայուն կմնա։ Երբ ասում եմ կայուն, չի նշանակում հենց այդ թիվն է մնալու։ Հնարավոր է 1-2 դրամի տատանում լինի։ Ջրի ծավալների աճը կանխատեսելով՝ 10 տարվա համար այնպիսի բազիսային գներ ենք պայմանավորվում, որ որոշակի կայունություն ունենանք»,-ասաց Գարեգին Բաղրամյանը։

ՀԾԿՀ-ն առաջարկում է սոցիալապես անապահով սպառողների համար ջրի սակագինը նույնը թողնել, իսկ մյուս սպառողների համար սակագինը 20 դրամով բարձրացնել։

Նշենք, որ այժմ գործող սակագինը 180 դրամ է, իսկ այժմ առաջարկվում է դարձնել 200 դրամ։

Ինչ վերաբերվում է Էլեկտրաէներգիայի և գազի սակագների թանկացման մասին շրջանառվող լուրերին  Գարեգին Բաղրամյանը որոշակիացված պատասխան չտվեց։