Լարսում կուտակումներն է՛լ ավելի կմեծանան

Հայաստանի Հանրապետության Ազգային ժողովի Տարածաշրջանային և եվրասիական ինտեգրման հարցերի մշտական հանձնաժողովի պատվիրակությունը հանձնաժողովի նախագահ Միքայել Մելքումյանի գլխավորությամբ այցելել է Վերին Լարս:

Տեղում մանրակրկիտ ուսումնասիրվել է տարիների ընթացքում արդեն իսկ խրոնիկ դարձած հերթերի, խցանումների  հետ կապված իրավիճակը:

ՌԴ Պետդումայի գործընկեր հանձնաժողովի՝ ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի տեղակալ Կազբեկ Կուցուկովիչ Տայսաևի գլխավորությամբ պատվիրակությունը հայկական պատվիրակության հետ միասին եղել է Հյուսիսային Օսիայի Հանրապետության պառլամենտում, որտեղ նրանց ընդունել է նաև պառլամենտի նախագահ պարոն Ալեքսեյ Վասիլևիչ Մաչնևը:

Ներկա են եղել շահագրգիռ բոլոր կողմերը՝ սահմանապահ զորքերի հրամանատարությունը, ղեկավար կազմը, ինչպես նաև Հյուսիսկովկասյան օկրուգի մաքսային ծառայության ղեկավարները, Հյուսիսային Օսիայի մաքսային ծառայության ղեկավարը:

Մանրակրկիտ ուսումնասիրվել են առկա բոլոր խնդիրները, մասնավորապես՝ Ռուսաստանից դեպի Վրաստան, Հայաստան թողունակության, հատկապես՝ բեռնատար ավտոտրանսպորտի թողունակության բարձրացման խնդիրը:

Սրա հետ կապված Ռուսատանի Դաշնության կառավարությունն արդեն նախատեսել է շուրջ 1.9 մլրդ ռուսական ռուբլի՝ նպատակային պետական ծրագրերի շրջանակում բեռնատարների անցուղիների թվաքանակը ընդլայնելու համար:

Միաժամանակ նշվել է, որ շինարարության ընթացքում կուտակումներն է՛լ ավելի կմեծանան, և այլընտրանքային լուծումներ են պետք:

Քննարկվել են նաև հարցեր՝ կապված անցակետերում ֆիտոսանիտարիայի կազմակերպման խնդիրների հետ: Այստեղ Ռուսաստանի Դաշնության և Հայաստանի Հանրապետության օրենքների ներդաշնակեցման խնդիր կա: Առաջադրված խնդիրներից մեկն այն է, որ  քաշերը ստուգվեն ոչ թե մաքսային վերջնակետում՝ Լարսում, այլ մինչև այդ առկա 3-4  այլ կետերում: Մյուսը ֆիտոսանիտարիայի լաբորատոր հետազոտությունների կենտրոնների հեռավորությունն է.  դրանք գտնվում են ոչ թե Վլադիկավկազում, որը Լարսից մոտ 120 կմ հեռավորության վրա գտնվող Կաբարդա-Բալկարական Հանրապետության մայրաքաղաք Նալչիկում: Դա նույնպես ձգձգումների պատճառ է դառնում:

Քննարկվել են նաև ուղևորատար տրանսպորտին վերաբերող հարցեր՝ կապված լիցենզավորված փոխադրումների, ավտոընկերությունների միջև հստակ ժամանակացույցերի արձանագրման և սպասարկման հետ: Ներկայացվել են սահմանապահ ծառայության կողմից սպասարկման խնդիրները:

Վերը նշված հարցերը կքննարկվեն նոյեմբերի 6-ին՝ Գյումրիում կայանալիք հայ-ռուսական միջպառլամենտական հանձնաժողովի նիստում, որտեղ հիմնական զեկուցողներից է նաև Հայաստանի Հանրապետության Ազգային ժողովի Տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյանը:

Քննարկվել են նաև այլ հարցեր՝ կապված բեռների ստուգման, խմբաքանակներով թողնման հետ: Հուսով ենք, որ մոտ ժամանակներս Հայաստանի Հանրապետության Պետեկամուտների կոմիտեն Լարսում կունենա մշտական ներկայացուցիչ:

Հանդիպմանը մասնակցում էր նաև Դոնի Ռոստովում Հայաստանի Հանրապետության հյուպատոս Արթուր Սարգսյանը: