Ճանապարհային երթևեկության կանոնների փոփոխություններ են սպասվում

Ճանապարհային ոստիկանության պետ Եգոր Կարապետյանն ապրիլի 30-ին լրագրողների հետ զրույցում հայտնեց, որ «Խաչմերուկի հատված» գծանշման՝ այսպես կոչված «վաֆլիների» հարցով ՃՈ-ն փոփոխությունն է ներկայացրել, և մայիսի 5-ից վարորդները կսկսեն տուգանվել՝ 5000 դրամի չափով: Այ

ՃՈ պետի տեղակալ Արման Չիլինգարյանն էլ տեղեկացրեց, որ մայիսի 5-ից փոփոխություններն են սպասվում նաև շրջանաձև երթևեկության խաչմերուկների վերաբերյալ: Արման Չիլինգարյանի խոսքով՝ փոփոխություններ են կատարվելու նաև ճանապարհային նշանների խմբերում, ավելացվելու են հետիոտներին և հեծանիվներին վերաբերող ճանապարհային նշանները:

«Մայիսի 5-ից ՀՀ բոլոր շրջանաձև երթևեկությամբ խաչմերուկներում, որտեղ չեն լինի տեղադրված հակառակ ճանապարհային նշաններ, որ դրսից մուտք գործողն ունի առավելություն, կանոնի ուժով շրջանաձև երթևեկության մեջ գտնվող վարորդը կունենա առավելություն»,- ասաց նա:

ՃՈ պետ Եգոր Կարապետյանը նաև նշեց, որ վարորդների տուգանման բալային համակարգի առաջարկող նախագիծը կառավարությունում է։ 

«Մոտ ժամանակներս Ազգային ժողովում կլինի։ Բալային համակարգի վերին շեմը 9 բալն է, խախտումները 0.5–ից մինչեւ 4 բալ են նախատեսվում են, 9 բալը լրացնելու դեպքում 6 ամսով կասեցվելու է վարորդական իրավունքը, երկրորդ անգամ 9 բալը լրացնելու դեպքում տվյալ վարորդը զրկվելու է վարորդական իրավունքից»,–նշեց նա։

ՃՈ պետի տեղակալ Արմեն Չիլինգարյանը, անդրադառնալով արագաչափերի բիզնեսի վերաբերյալ հարցին, նշեց՝ ճանապարհային ոստիկանության կողմից օգտագործվող ամբողջ գույքը՝ արագաչափերը, տեսախցիկները, պարեկային ավտոմոբիլների և դրանցում տեղադրված սարքավորումները պետության սեփականությունն են։

«Ճանապարհներին տեղադրված արագաչափերը և Երեւանում տեղադրված տեսախցիկները հանձնված են հավատարմագրային կառավարմանը: Բայց ասել, թե դա արագաչափերի բիզնես է, կարծում եմ, ճիշտ չէ, եւ իրականությանը չի համապատասխանում»,- ասաց Չիլինգարյանը:

Անդրադառնալով արագաչափերի հավատարմագրային կառավարչին՝ նա ասաց, որ  հավատարմագրային կառավարիչը «Սեքյուրիթի դրիմ» ընկերությունն է, և ընկերության հետ պայմանագիր կնքել է նախորդ կառավարությունը, ոչ թե ՃՈ-ն։

Անդրադառնալով Նիկոլ Փաշինյանի՝ «Սաշիկ Սարգսյանի արագաչափեր» ձևակերպմանը, Արմեն Չիլինգարյանն ասաց, որ երկրի ղեկավարի հայտարարությունները չի մեկնաբանի: