Դադարել են Տարոն Մարգարյանի պաշտոնական լիազորությունները, բայց ոչ մեր հարաբերությունները. Կամո Արեյան

Երևանի նախկին քաղաքապետ Տարոն Մարգարյանի հրաժարականից հետո քաղաքապետարանում շարունակվում են նորմալ, բնականոն աշխատանքները: Այս մասին օգոստոսի 22-ին լրագրողների հետ զրույցում ասաց Երևանի քաղաքապետի պաշտոնակատար Կամո Արեյանը:

Նա նշեց՝ Տարոն Մարգարյանի հետ շարունակում է ունենալ բավականին լավ, մարդկային հարաբերություններ:

«Տարոն Մարգարյանին հրաժարականից հետո հանդիպել եմ, մեր մարդկային հարաբերությունները չեն սառել, պարզապես դադարել են իր պաշտոնական լիազորությունները, բայց ոչ մեր հարաբերությունները», - ասաց Երևանի քաղաքապետի պաշտոնակատարը:

Նա չցանկացավ որևէ մեկնաբանություն տալ առաջիկա ընտրությունների կամ դրանց առաջադրված թեկնածուների մասին՝ նշելով, ր իր տեսալակնը իր գաղտիքն է:

Կամո Արեյանը անդրադարձավ նաև «Սանիթեքի» գործունեությանը՝ նշելով, որ որպես քաղաքապետի պաշտոնակատար, ընթացակարգով բոլոր քայլերը ձեռնարկել է, տույժի է ենթարկել «Սանիթեք» ընկերությանը:

«Այս պայմանագիրը լավագույն պայմանագրերից մեկն է եղել՝ որպես իրավական փաստաթուղթ, այլ բան է, որ կատարող օպերատորը թերանում է: Ամբողջ քաղաքն աղբի մեջ չէ, բայց թերանում է «Սանիթեքը»: Անցյալ տարի էլ նման դեպք եղավ: Խնդիրը «Սանիթեքի» ներքին խնդիրն է, նա՝ որպես օպերատոր, պարտավոր է կատարել իր պարտականությունները, և մենք մինչև վերջ պահանջելու ենք, որ կատարի դրանք»,-ասաց նա: