Դիվերսիոն ներթափանցման մասին Ադրբեջանի տարածած լուրն ամբողջությամբ մտացածին և կեղծ է. ԱՀ ՊՆ

Արցախի Հանրապետության Պաշտպանության նախարարությունը հայտնում է.

«Ադրբեջանի ՊՆ հաղորդագրությունն այն մասին,  թե իբր ՊԲ ստորաբաժանումները դիվերսիոն ներթափանցում են կատարել և տեղադրել են ականներ, ինչի հետևանքով  սեպտեմբերի  10-ին` ժամը 13։30-ի սահմաններում ականապայթունային վիրավորում է ստացել ադրբեջանցի զինծառայող, ամբողջությամբ մտացածին և  կեղծ է։

Ինչպես արդեն նշել ենք, վերջին շրջանում Ադրբեջանի ՊՆ-ն կտրուկ մեծացրել է ստահոդ հաղորդագրությունների հրապարակման հաճախականությունը,  որոշակիորեն փոխվել է նաև այդ կեղծ հաղորդագրությունների բնույթը. եթե  մինչ  այժմ  ադրբեջանական կողմը ՊԲ-ին ներկայացնում էր հրադադարը խախտելու կամ զենք-զինամթերքի փոխադրման կեղծ մեղադրանքներ, ապա այժմ  հնչեցնում է դիվերսիոն գործողություններ իրականացնելու կամ այդպիսի գործողությունների նախապատրաստություն կատարելու վերաբերյալ շինծու մեղադրանքներ։

Ադրբեջանի ՊՆ  նման պնդումները իրականության հետ որևէ աղերս  չունեն։  Այդ եղանակով ադրբեջանական կողմն իրականացնում է  հերթական սադրանքի տեղեկատվական  ակտիվ նախապատրաստություն։

ԱՀ ՊՆ մամուլի ծառայություն»։