Կապիտանը սուրճի բաժակի չափով է բենզին լցրել փայտի վրա․ ուշագրավ մանրամասներ․ News.am

Ազատ գյուղի զինվորական կացարանում բռնկված հրդեհի հետեւանքով զոհված15 զինվորի մահվան գործով մեղադրյալ, կապիտան Եղիշե Հակոբյանի թմրաբանական փորձաքննության հետազոտության եզրակացությամբ նրա արյան մեջ թմրանյութ չի հայտնաբերվել։ Այս մասին NEWS.am-ի հետ զրույցում ասաց նրա փաստաբան Հովսեփ Սարգսյանը։

«Հետեւաբար այն տարածված կարծիքը, թե Եղիշե Հակոբյանը օգտագործել է թմրամիջոց, իրականության հետ աղերս չունի»,– ասաց Հովսեփ Սարգսյանը։

Կապիտան Եղիշե Հակոբյանը, որը հրդեհի պաշտոնական վարկածով գլխավոր գործող անձն է, հրդեհից գրեթե մեկ ամիս անց՝ նախօրեին՝ փետրվարի 15–ին,  Այրվածքանաբանության ազգային կենտրոնում ցուցմունք է տվել։

«Եղիշե Հակոբյանն իր  ցուցմունքում նշել է, որ ինքը վառարանը վառելու համար ոչ թե կացարանից, այլ մոտիկ տեղից պլաստմասե ամանով բենզին է բերել, որովհետեւ այլ նյութեր չեն եղել վառելու համար, ունեցել են փայտանյութ, որը եղել է թաց։ Տարան կիսով չափ է լցված եղել կամ մի քիչ շատ, բայց ոչ հինգ լիտր։ Վառարանը, որն ունեցել է երկու մուտք, մեկը վերեւի հատվածում կլոր տեսքով, մյուսը՝ դռան հատվածում, որտեղից փայտ են լցնում։ Եղիշեն պատմել է, որ սուրճի բաժակի չափով բենզին է լցրել փայտի վրա, որ փայտը կպնի, որ չորանա, համ էլ կպնի, որովհետեւ թաց է եղել փայտը, բայց չի կպել, այսինքն՝ բենզին լցնելուց հետո կրակ չի եղել։

Եղիշեն ասել է, որ սպասել է  մի տասը վայրկյան, այդ ընթացքում բենզինով տարան ձեռքն է եղել։ Եղիշեն պատմել է, որ վառարանը ծխում էր։ Նա պատմել է, որ երբ առաջ է եկել, կռացել դեպի էդ հատվածը, որտեղ վառարանի կլոր հատվածն է, այսինքն՝ մյուս մուտքը, որ տեսնի, թե ինչ է կատարվում, բոցը տվել է դեմքին։ Եղիշեն ենթադրում է, որ բոցը նաեւ վառարանի դռնակից է դուրս եկել, որովհետեւ իր ձեռքերը նույնպես այրվել են։ Ըստ կապիտանի՝ ինքը կանեստրը դրել է գետնին ու փորձել կրակը մարել, բայց կրակն անցել է պլաստմասե տարայի մեջ։ Եղիշեն պատմել է, որ նույն պահին վերցրել ու դուրս է շպրտել տարան։ Հավանաբար այդ ընթացքում շատ քիչ քանակությամբ բենզին է լցվել մուտքի դռան վրա ու նաեւ դուռն է կպել»,– ցուցմունքից մանրամասներ ներկայացրեց փաստաբանը։

Եղիշե Հակոբյանի ցուցմունքի համաձայն՝ այդ ժամանակ նույն սենյակում է եղել նաեւ ժամկետային զինծառայող Լյովա Խառատյանը, ում հետ կապիտանը փորձել է մարել կրակը։ Ըստ Եղիշե Հակոբյանի ցուցմունքի՝ Լյովան վազել է ննջարանի կողմ, որտեղ մյուս 15 ժամկետային զինծառայողները, որոնք 22։30–ից պառկել էին, չեն արձագանքել։ Կապիտանը ցուցմունքում նաեւ նշել է, որ պառկելուց հետ ննջասենյակում ելումուտ է եղել։

«Եղիշե Հակոբյանը պատմել է, որ երբ վնասվածքներ է ստացել, գոռացել է, ցավեր է ունեցել։ Նա ասել է, որ անընդհատ գոռացել են, որ մյուս զինծառայողները  դուրս գան։ Իր վառվելն ու կրակը ննջարանին հասնելը 15–ից 20 րոպե է տեւել, որից հետո Եղիշեն դուրս է եկել, քանի որ լավ այրված է եղել։ Եղիշեն շապիկը վրայից հանել է, լուսամուտներից գոռացել, որ դուրս գան, բայց զարմանալիորեն որեւէ մեկը չի արթնացել, դուրս չի եկել։ Եղիշեն ասել է, որ ինքը չգիտեր՝ տղաները քնա՞ծ են եղել, թե՝ ոչ։ Բայց նրա խոսքով՝ զարմանալի էր, որ ոչ մեկը դուրս չեկավ։ Զարմանքն էլ ավելի է խորացել, երբ ննջասենյակի վերջում գտնվող երկու զինվորները դուրս են եկել, իսկ մյուս 15 զինվորները դուրս չեն եկել ու մահացել են»,– պատմեց փաստաբան Հովսեփ Սարգսյանը՝ հավելելով, որ ննջասենյակում բացի 15 զինվորից գտնվել են նաեւ երեք զինվոր, որոնցից միայն երկուսն են կարողացել  դուրս գալ։

Եղիշե Հակոբյանը պատմել է, որ ինժեներասակրավորական վաշտի զինվորներն այդ օրը աշխատել էին, հոգնած են եղել ու 22։30–ի սահմանում պառկել էին, որից հետո սակայն սենյակում ելումուտ է եղել։ Ննջասենյակը, ըստ կապիտանի, ջեռուցվել է նաեւ էլեկտրավառարանով։

Փաստաբան Հովսեփ Սարգսյանի խոսքով՝ Եղիշե Հակոբյանը վաշտից որեւէ զինծառայողի հետ լարված հարաբերություն չի ունեցել։

Փաստաբանը պնդում է՝ զինվորների մահը հետեւանք է ինչ–որ բանի, պատճառները պետք է փնտրել ուրիշ տեղ, իսկ հրդեհը առիթ է։

«Պատճառների ու զինվորների մահվան մեջ պետք է լինի պատճառահետեւանքային կապ, հակառակ պարագայում ցանկացած տեսակի քննություն կլինի իմաստազրկված։ Եղիշե Հակոբյանի հրդեհը պարզապես առիթ է, պատճառները պետք է այլ տեղ ման գալ»,– ասաց նա։

Նշենք, որ հրդեհի հետեւանքով կապիտանը այրվածքներ էր ստացել։ Նա շարունակում է բուժումը Այրվածքաբանության ազգային կենտրոնում, որտեղ երկու օր առաջ վիրահատվել էր։ Կատարվել է դեմքի եւ դաստակների մաշկի փոխպատվաստում։

Հիշեցնենք, որ հունվարի 19–ին Գեղարքունիքի մարզի Ազատ գյուղում տեղակայված ՊՆ N զորամասի ինժեներասակրավորական վաշտի կացարանում հրդեհ էր բռնկվել։

Ըստ Քննչական կոմիտեի՝ կապիտանն այդ օրը՝ ժամը 00:40-ի սահմաններում, հանդիսանալով նստեցման շրջանի պատասխանատու, խախտել է շրջապատի համար առավել վտանգ ներկայացնող նյութի՝ ավտոբենզինի հետ վարվելու վերաբերյալ օրենսդրությամբ սահմանված պահանջը, ըստ որի՝ հրդեհային անվտանգության նպատակով արգելվում է վառարանները վառելու համար որպես կպչան, ավտոբենզինի եւ այլ տեսակի դյուրավառ հեղուկների օգտագործումը:

Կապիտանը օրվա հերթապահից ճշտելով հատկացված դիզելային վառելիքի եւ ավտոբենզինի գտնվելու վայրը, սեփական նախաձեռնությամբ, կացարանի հարակից տարածքում բացազատված ավտոհավաքակայանից վերցրել է տրանսպորտային միջոցների մեկնարկիչները գործի գցելու համար հատկացված՝ 5 լիտր տարողությամբ ավտոբենզինով լցված տասը հատ պլաստմասե տարաներից մեկը, վերադարձել է կացարան եւ վառարանը վառել ավտոբենզինով: Արդյունքում կացարանում բռնկվել է հրդեհ: Հրդեհի հետեւանքով մահացել է 15 պարտադիր ժամկետային զինծառայողներ, 3 զինծառայող ստացել են այրվածքներ:

Վառարանը վառել փորձող կապիտանին մեղադրանք է առաջադրվել ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ):

Այս գործով մեղադրյալի կարգավիճակ ունեն եւս երեք զինվորականներ, որոնցից երկուսը կալանքի տակ են, մեկի նկատմամբ որպես խափանման միջոց է ընտրվել ստորագրությունը՝ չհեռանալու մասին: