Քաղաքապետի առաջին տեղակալը չկարողացավ ասել, թե ինչ հիմնավորմամբ են Չեխովի դպրոցում նոր ԺՊ նշանակել

Չեխովի անվան միջնակարգ դպրոցի աշակերտներն ու ծնողները բողոքի ակցիա էին կազմակերպել Երևանի քաղաքապետարանի մոտ՝ պահանջով, որ չեն ցանկանում իրենց դպրոցի տնօրեն նշանակվի մի մարդ, ում չեն ճանաչում: Նրանք քաղաքապետարան էին գնացել ի աջակցություն դպրոցի նախկին տնօրենի պաշտոնակատար Տաթևիկ Մելքոնյանի, ով երկար տարիներ դպրոցում է աշխատել:

Քաղաքապետարանում ակցիայի մասնակիցներին դիմավորեց քաղաքապետի առաջին տեղակալ Լևոն Հովհաննիսյանը, ով պնդեց, որ աշակերտները պետք է հետ գնան դպրոց: Իսկ նրա հարցին, որ աշակերտներն անչափահաս են և չպետք է գային, վերջիններս պատասխանեցին, որ եկել են ծնողների հետ:

«Երեխաները պետք է վերադառնան դասի, երեխաների հետ ես բան չեմ խոսելու»,- նշեց տեղակալը և համաձայնեց իր մոտ քննարկման հրավիրել միայն ուսուցիչներին ու ծնողներին:

Իսկ լրագրողների հարցերին՝ ի՞նչ հիմնավորմամաբ են Տաթևիկ Մելքոնայնին հանել ժամանակավոր պաշտոնակատարի պաշտոնից և նշանակել իրենց թեկնածու Դիանա Մինասյանին, Հովհաննիսյանն այդպես էլ չկարողացավ պատասխանեց. «Նույն հիմնավորմամբ ենք հանել, որով նրան նշանակել էինք ժամանակավոր պաշտոնակատար»:

Մեր ճշտող հարցին՝ ո՞րն է այդ հիմնավորումը, Լևոն Հովհաննիսյանը միայն ասաց. «Դե լավ էլի»: