Ոստիկանությունը պահանջել է ակցիայի ընթացքում բարձրախոս չօգտագործել. ՀՅԴ ՆԱՈՒՄ֊ը չի կատարելու պահանջը

 ՀՅԴ «Նիկոլ Աղբալյան» ուսանողական միությունը հայտարարություն է տարածել, որը ներյակացնում ենք ստորև․

«Սիրելի՛ հայրենակիցներ,

Այսօր` 15։00֊ին Կառավարության գլխավոր մասնաշենքի առջև մեր կողմից նախատեսված ակցիայի հարցով մեզ հետ կապ են հաստատել ՀՀ ոստիկանությունից` պահանջելով ակցիայի ընթացքում բարձրախոս չօգտագործել։

Մենք դատապարտում ենք  «Հավաքների ազատության մասին» ՀՀ օրենքի կոպտագույն խախտումով քաղաքացիների իրավունքների և ազատությունների ոտնահարումը գործող իշխանությունների կողմից, միևնույն ժամանակ արձանագրում ենք, որ չենք կատարելու ՀՀ Ոստիկանության կողմից ներկայացվող ապօրինի պահանջը։

Ժամը 15։00֊ին կհանդիպենք Կառավարության գլխավոր մասնաշենքի առջև»։

Հիշեցնենք՝ ՀՅԴ «Նիկոլ Աղբալյան» ուսանողական միությունը ակցիա է նախատեսում կառավարության շենքի առջև:

Ուսանողական միությունն իր պաշտոնական էջում հայտարարել է հետևյալը. Սիրելի՛ հայրենակիցներ, վաղը՝ 15։00-ին հավաքվում ենք կառավարության գլխավոր մասնաշենքի առջև` հերթական անգամ ի ցույց դնելու ՀՀ վարչապետի խոսքի, գործի և իրականության անհամապատասխանությունը։