Քոչարյանը կարող է իրավիճակը վերցնել իր ձեռքը, իսկ երբ հաղթենք՝ նա կվերցնի իշխանությունը Հայաստանում և Արցախում․ Հարությունյանի մտահոգությունը․ Politik.am

Politik.am-ը գրում է․ Պատերազմի աղետալի ավարտից հետո Հայաստանի և Արցախի իշխանությունները իրենց մեղքը մեղմելու համար տարատեսակ մեթոդներով փորձում էին հանրությանը հասցնել այն միտքը, թե նախկին փորձառու պաշտոնյաները ոչնչով չեն օգնել իրենց և սպասում էին հայկական կողմի պարտությանը։

Իրականությունն այն է, որ պատերազմի օրերին նախկին մի շարք պաշտոնյաներ արել են ամեն բան, որպեսզի օգտակար լինեն հայրենիքին։ Հանրությանն արդեն հայտնի է, թե ինչ կերպ են ռազմական գործողությունների կառավարումից հեռու պահել բարձրաստիճան մի շարք զինվորականների, որոնք առաջին պատերազմի հաղթանակի կերտողներն էին։

Արցախի առաջին նախագահ և Հայաստանի երկրորդ նախագահ Ռոբերտ Քոչարյանի հետ կապված մի միջադեպ ամբողջապես բացում է հայկական երկու պետությունների գործող իշխանությունների իրական մտահոգությունները։

Պատերազմի հենց առաջին օրերին Արցախ մեկնած նախագահ Ռոբերտ Քոչարյանը փորձել էր հանդիպել նախագահ Արայիկ Հարությունյանի հետ։ Վերջինս մերժել էր հանդիպման առաջարկը։ Երբ Հարությունյանի մտերիմները փորձել էին հասկանալ, թե ինչու՞ է մերժել պատերազմ անցած նախագահի հանդիպման առաջարկը, ով նաև հրաշալի արտաքին կապեր ունի` Արայիկ Հարությունյանն ասել էր, որ եթե Քոչարյանի հետ հանդիպի, ապա իրավիճակի վերահսկողությունը կհայտնվի վերջինիս ձեռքին, իսկ երբ պատերազմը դրական ելքով ավարտվի, ապա ինքն ու Փաշինյանը շատ արագ կկորցնեն իրենց իշխանությունը, քանի որ մարդիկ հաղթանակը կրկին կկապեն Քոչարյանի անվան հետ։

Արայիկ Հարությունյանի այս հայտարարությունը սառը ցնցուղ էր եղել իր մտերիմների համար և նրանցից շատերը հենց պատերազմի առաջին օրերին էին հասկացել, որ հայկական կողմը պարտվելու է,  քանի որ գործող իշխանությունների համար ավելի ցանկալի է պարտվել, միայն թե հնարավոր հաղթանակը չկապվի Քոչարյանի անվան հետ։