Քվորում չի եղել, «Իմ քայլից» միայն Լենա Նազարյանն էր ԱԺ ներկայացել. Նաիրա Զոհրաբյան

«Իմ քայլը» խմբակցության՝ խորհրդի անդամ պատգամավորները որևէ պատճառաբանություն չեն ներկայացրել՝ ինչու չեն եկել ԱԺ խորհրդի նիստին: Այս մասին լրագրողների հետ զրույցում հայտարարեց ԲՀԿ-ական պատգամավոր Նաիրա Զոհրաբյանը:

«Քվորում չեղավ, խորհուրդը չկարողացավ քվորում ապահովել, և այս պահին ունենք իրավիճակ, երբ պատգամավորները ևս երկու ժամ դեռ կարող են հավաքվել։ Իմքայլական պատգամավորների անվտանգությունը միանշանակ պաշտպանված է, իրենք մեր գործընկերներն են: Մենք երաշխավորում ենք բոլորի անվտանգ մուտքն ԱԺ շենք: Քվորումը երկու ժամ բաց է», - ասաց նա:

Նաիրա Զոհրաբյանը միաժամանակ շեշտեց, որ ԱԺ փոխնախագահ Լենա Նազարյանը ներկայացել է ԱԺ և միայն ասել, որ քանի որ քվորում չկա, նիստը չի կայանա:

«Փորձել ենք զանգահարել իմքայլական մեր գործընկերենրին, բայց նրանք կամ անհասանելի են, կամ հեռախոս չեն վերցնում», - ասաց պատգամավորը: