ԱՄՆ դեսպանը՝ Արցախի վերաբերյալ Լավրովի աղմկահարույց հայտարարության մասին

Հայաստանում ԱՄՆ արտակարգ եւ լիազոր դեսպան Լին Թրեյսին, ֆեյսբուքյան եթերի ժամանակ պատասխանելով այն հարցին՝ արդյո՞ք ԱՄՆ-ն կիսո՞ւմ է Ռուսաստանի արտգործնախարար Սերգեյ Լավրովի հայտարարությունը ԼՂ հակամարտության լուծման վերաբերյալ, նշեց․

«Մեր՝ որպես Մինսկի խմբի համանախագահների խնդիրն է աջակցել ղարաբաղյան հիմնախնդիրը խաղաղ ճանապարհով լուծելու ջանքերին։ Ռուսաստանը ԵԱՀԿ Մինսկի խմբի եռանախագահող երկրներից մեկն է, եւ մենք փորձում ենք կառուցողական մեթոդներով տանել մեր աշխատանքը: Ես ուզում եմ նշել, որ Վաշինգտոնն ակտիվորեն ներգրավված է որպես ԵԱՀԿ Մինսկի խմբի համանախագահի աշխատանքներում: Մենք շարունակում ենք հավատարիմ մնալ այս ձգձգված հակամարտության խաղաղ լուծմանը»,- ասաց նա:

Դեսպանը նշեց, որ համավարակի պայմաններում խորհրդատվությունները ԵԱՀԿ շրջանակներում շարունակվում են, այդ թվում՝ վիրտուալ ձեւաչափով կողմերի ներգրավմամբ:

Նա նաև նշեց, որ Արցախում ականազերծման ԱՄՆ ծրագիրն ավարտվել է։ «Աշխատում ենք ժողովուրդներին խաղաղության պատրաստելու ուղղությամբ: : Մենք հպարտանում ենք այդ աշխատանքներով, որոնք իրականացվում են ծրագրի շրջանակում: Վերջն տարիներին այդ ծրագրի շրջանակում Լեռնային Ղարաբաղի ժողովրդին տրամադրվել է 70 մլն դոլարի չափով աջակցություն»,-ասել է նա: