Մնացականյանը Մոնակոյում նախագահել է Ֆրանկոֆոնիայի նախարարական համաժողովը

Հոկտեմբերի 30-ին եւ 31-ին Մոնակոյում տեղի ունեցավ Ֆրանկոֆոնիայի 36-րդ նախարարական համաժողովը, որը նախագահեց ՀՀ ԱԳ նախարար Զոհրաբ Մնացականյանը: Հանդիպմանը մասնակցում էին կազմակերպության անդամ պետությունների արտգործնախարարներ եւ պատվիրակությունների ղեկավարներ:

ԱԳՆ-ից հայտնում են, որ բացման ելույթներով հանդես եկան ՀՀ ԱԳ նախարար Զոհրաբ Մնացականյանը, ՖՄԿ գլխավոր քարտուղար Լուիզ Մուշիկիվաբոն եւ Մոնակոյի պետնախարար Սերժ Տելը: Ողջունելով համաժողովի մասնակիցներին՝ նախարար Մնացականյանը ներկայացրեց երեւանյան գագաթաժողովի ժամանակ ֆրանկոֆոնիայի պետությունների եւ կառավարությունների ղեկավարների կողմից ստանձնված պարտավորությունների կատարման ընթացքը եւ Հայաստանի նախագահության  ձեռնարկած նախաձեռնությունները:

Այդ առնչությամբ նախարար Մնացականյանը որպես Հայաստանյան նախագահության առաջնահերթություն ընդգծեց ֆրանկոֆոն տարածաշրջանում տնտեսական կապերի ամրապնդումը եւ թվային օրակարգի խթանումը, նորարարության եւ նոր տեխնոլոգիաների առաջխաղացումը: Զոհրաբ Մնացականյանը նշեց, որ, այդ ոլորտներին մեր կողմից տրվող կարեւորությամբ պայմանավորված, բանաձեւի նախագծի ներկայացումը վճռական քայլ է Ֆրանկոֆոն տարածքում առկա թվային ներուժի լիարժեք իրացման եւ նոր գաղափարներով հանդես գալու ճանապարհին: 

«Այս հարցերի վերաբերյալ մեր հետաքրքրությունն արդեն արտացոլվել է Երեւանյան գագաթաժողովի աշխատանքներում եւ դրա շրջանակներում ընդունված հռչակագրում: Ազգային մակարդակով ՀՀ կառավարությունը հայտարարել է, որ տեղեկատվական տեխնոլոգիաները ռազմավարական ոլորտ են հանդիսանում, եւ հետեւողական ջանքեր են գործադրվում նորարարությունների, բարձր տեխնոլոգիաների ոլորտի խթանման ուղղությամբ: Համոզված ենք, որ ֆրանսախոս աշխարհում նորարարության եւ նոր տեխնոլոգիաների խթանումը մեր առջեւ ծառացած հիմնական առաջնահերթություններից մեկն է»:

Նախարարը հավելեց, որ, ի թիվս այլ նախաձեռնությունների, Հայաստանը իր նպաստը կունենա Ֆրանկոֆոնիայի եւ տարածաշրջանային տնտեսական ինտեգրման գործընթացների տնտեսական ֆորումի կազմակերպման գործում: Հայաստանի արտաքին քաղաքական գերատեսչության ղեկավարը կարեւորեց վերոնշյալ նախաձեռնությունների իրականացման գործում Ֆրանկոֆոնիայի միջազգային կազմակերպության հետ սերտ համագործակցությունը, ինչպես նաեւ տարածաշրջանային եւ միջազգային կազմակերպությունների ակտիվ ներգրավվածությունը:

ՀՀ ԱԳՆ ղեկավարը վերահաստատեց Հայաստանի գնահատանքը Մոնակոյի իշխանությունների կողմից այս համաժողովի քննարկմանը ներկայացված բնապահպանական թեմատիկայի առնչությամբ՝ վստահություն հայտնելով, որ այն կամրապնդի Կազմակերպության կողմից արդեն իսկ որդեգրված դիրքորոշումը կլիմայի փոփոխությունների դեմ պայքարում, ինչպես նաեւ շրջակա միջավայրի պաշտպանության ու կենսաբազմազանության խթանմանն ուղղված մեր գործողություններում:

Նախարարական երկօրյա համաժողովի արդյունքում մասնակիցների կողմից ընդունվեց չորս բանաձեւ՝ Օվկիանոսների վերաբերյալ, Գիտության, կրթության եւ թվային տնտեսության զարգացման գործում նորարարության ունեցած դերի վերաբերյալ, ՄԱԿ-ի՝ Երեխաների իրավունքների պաշտպանության Կոնվենցիայի 30-րդ ամյակի վերաբերյալ եւ Ֆրանկոֆոնիայի 50 ամյակի վերաբերյալ:

Նիստի ավարտին Ֆրանկոֆոնիայի նախարարական համաժողովի նախագահող, ՀՀ ԱԳ նախարար Զոհրաբ Մնացականյանը 37-րդ նախարարական համաժողովի նախագահությունը հանդիսավոր արարողությամբ փոխանցեց Թունիսին: