ՍԴ որոշման չկատարումը քաղաքական հետապնդման ևս մեկ ապացույց է. Ստեփան Մարգարյան

«Այն, որ պրոցեսը այն ժամանակ էլ տրամաբանական չէր, երբ որ սկսել էին, հիմա առավել ևս տրամաբանական չէ: Ձևացնել, թե ՍԴ որոշումից հետո իբր ոչինչ չի եղել և ասել, որ հիմքեր չունենք, որ Երկրորդ նախագահն ազատ արձակվի, ամենաքիչը անտրամաբանական է»:

Այս մասին Yerevan.Today-ի հետ զրույցում ասաց ԱԺ նախկին պատգամավոր, «Այլընտրանքային նախագծեր խմբի» անդամ Ստեփան Մարգարյանը: Անդրադառնալով ՍԴ որոշման չկատարմանը և ՀՀ գլխավոր դատախազության հայտարարությանը՝ Մարգարյանը, մասնավորապես, ասաց.

«Ի սկզբանե քաղաքական հետապնդում է գնացել, հիմա իրավաբանական մեկնաբանությունը չի օգնի: Կարելի է վերցնել որոշումը և ասել, որ դա այպես չի, մի երկու անհասկանալի ձևակերպում տալ, որից ոչ մեկ ոչինչ չի հասկանա և ասել այդ պատճառով ազատ չենք թողնի, հետևաբար ևս մեկ անգամ ապացուցվում է, որ գործընթացը իրոք քաղաքական է: Հիմա վստահաբար կարող ենք ասել, որ քաղաքական որոշում է կայացվում, դրանով իսկ լուրջ խախտումներ թույլ տալով, քանի որ ՍԴ որոշումը վերջնական է և բեկանման ենթական չէ:

Ինչ վերաբերում է պատասխանատվությանը, ապա կարծում եմ, որ այս պահին դեռևս դատավորի խնդիրը չէ, քանի որ դատավորը ենթարկվում է ճնշումների, չնայած դատավորն էլ պատասխանատվության բեռ ունի, ինքը ազատ է օրենքով, պարզապես ենթարկվում է ճնշումների և տուրք է տալիս այդ ճնշումներին, այնուամենայնիվ պատասխանատվությունը կրելու է իշխանությունը, այդ թվում նաև դատախազությունը»: