Ընտրապայքարի ընթացքում աննախադեպ էր ատելության մթնոլորտը, դա հետքայլ է. Դավիթ Հարությունյան

Այս ընտրությունը չի արտացոլում երկրում առկա իրական իրավիճակը, սա պարտադրված ընտրություն է, և շատերն արդեն իրենց հիասթափությունն արտահայտել են: Այս մասին ասաց ՀՀԿ համապետական ցուցակով պատգամավորության թեկնածու առաջադրված Արփինե Հովհաննիսյանը՝ անդրադառնալով մասնակցության ցածր ցուցանիշին:

Նրա խոսքով՝ պետք է ամեն ինչ անել, որ Հայաստանը լինի երկիր, որտեղ այլակարծությունը չի ճնշվում, որտեղ ատելություն չկա: Ա.Հովհաննիսյանը նշել է, որ ՀՀԿ-ն քարոզարշավի ընթացքում բազմիցս խոսել է իր բացթողումների, նաև հետագա անելիքների մասին, և հանրությունն, ըստ նրա, հետևություն կանի:

ՀՀԿ նախընտրական շտաբի պետ Դավիթ Հարությունյանի համոզմամբ էլ այս ընտրությունները չեն տարբերվում 2017 թվականի ընտրություններից: «Աննախադեպ էր ատելության մթնոլորտը, որը ձևավորվեց Հայաստանում՝ այս ընտրապայքարի ընթացքում, հասարակության բաժանումը սեւերի և սպիտակների, ցավոք սրտի, բովանդակային առումով դա հետքայլ է»,-ասաց Հարությունյանը։

Ըստ նրա՝ ընդդիմության ձայնը պետք է շարունակի լսելի լինել խորհրդարանում, որովհետև ուժեղ ընդդիմությունն է, որ մշտապես շնչում է իշխանության թիկունքում և թույլ չի տալիս, որ իշխանությունը կատարի սխալ քայլեր:

Նա նշեց, որ այս ընտրություններին ավելի ակտիվ է ՀՀԿ-ի երտասարդական թեւը, սակայն խորհրդակցում են ՀՀԿ նախագահ Սերժ Սարգսյանի հետ։