ԼՂ հարցում առաջխաղացման համար կլիմա պետք է ստեղծեն հակամարտող կողմերը. Զախարովա

ՌԴ ԱԳՆ պաշտոնական ներկայացուցիչ Մարիա Զախարովան հերթական ճեպազրույցի ժամանակ անդրադարձել է նաև Լեռնային Ղարաբաղի հիմնախնդրին: Զախարովային խնդրել են մեկնաբանել, թե ինչ է ներկայումս կատարվում Լեռնային Ղարաբաղի հակամարտության գործընթացում` հաշվի առնելով այն, որ թեման օրերս քննարկվել է ՌԴ նախագահի` Ադրբեջանի նախագահի, ինչպես նաև ՀՀ վարչապետի հետ հանդիպումների ժամանակ, հայտնում է Sputnik Ադրբեջանը։

Զախարովան նշել է, որ ռուսական կողմը վերլուծում է բոլոր հայտարարությունները, այն ամենը, ինչ խոսվում է ԼՂ հարցով, և ինքը կցանկանար հիշեցնել, որ Ռուսաստանի դիրքորոշումն այդ հարցով անփոփոխ է. «Մենք ելնում ենք այն բանից, որ ԼՂ վերջնական կարգավիճակը պետք է որոշվի քաղաքական, դիվանագիտական ճանապարհով` հակամարտության կողմերի պայմանավորվածությունների  հիման վրա: Ռուսաստանն իր կողմից՝ որպես ԵԱՀԿ Մինսկի խմբի համանախագահ, պատրաստ  է շարունակել  կողմերին միջնորդական աջակցություն ցուցաբերել` փոխզիջման հասնելու համար»,- նշել է Զախարովան:

ՌԴ արտաքին գերատեսչության ղեկավարը հավելել է, որ առաջխաղացման համար կլիմա պետք է ստեղծեն հակամարտության կողմերը։