Լեռնային Ղարաբաղի կարգավիճակի հարցն արժեր թողնել հաջորդ սերունդներին. Սերգեյ Կոպիրկին

Լեռնային Ղարաբաղի կարգավիճակի հարցն այն հարցն է, որն արժեր թողնել հաջորդ սերունդներին, երբ կձևավորվեն բոլորին ընդունելի պայմաններ հարցի արդար լուծման համար։ Այս մասին լրագրողների հետ զրույցում նոյեմբերի 1-ին ասել է  Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։

Նա կարևորել է  Սոչիի եռակողմ հանդիպումը՝  նշելով , որ եկել է կարգավորման բոլոր ամենաբարդ հարցերի առարկայական քննարկման ժամանակը։

Դեսպանը հիշեցրել է Ռուսաստանի նախագահի խոսքերն այն մասին, որ բոլոր հարցերի վերաբերյալ  չէ, որ հաջողվել է պայմանավորվել․ «Այնուամենայնիվ շատ կարևոր է, որ քննարկումը կայացավ և կողմերը պատրաստակամություն դրսևորեցին՝  առաջ շարժվելու կարգավորման ուղղությամբ։ Շատ կարևոր է նաև այն, որ հանդիպումը տեղի ունեցավ Ռուսաստանում, և  սա ակնհայտ վկայում է այն մասին, որ Ռուսաստանը, չնայած խնդիրներին, որոնք պետք է հիմա լուծել այլ տարածաշրջաններում, մեծ ուշադրություն է հատկացնում Հարավային Կովկասի իրավիճակին և չի թուլացնում ջանքերը կարգավորման ոլորտում»,- ասել է Կոպիրկինը։

Դեսպանը կրկնել է  Վլադիմիր Պուտինի խոսքերն  առ այն, որ կարգավորման ամբողջ համալիրը պետք է լինի Հայաստանի  ևԱդրբեջանի միջև պայմանավորվածությունների արդյունք։

«Ինչ վերաբերում է խաղաղության պայմանագրին և դրույթներին, որոնք պետք է մտնեն դրա մեջ, դատելով Սոչիի հանդիպման արդյունքներից՝ առայժմ կան հարցեր, որոնք չի հաջողվում համաձայնեցնել, բայց որոնց ուղղությամբ աշխատանքը կշարունակվի»,- ամփոփել է դեսպանը։