Տաթևին և նրա եղբորն առևանգել են, որովհետև բարձրաձայնել են գերեվարված քեռու և մյուս գերիների խնդիրը․ պատգամավոր

Տիգրան Աբրահամյանը ֆեյսբուքյան իր էջում գրում է․

Տաթև Սողոյանին և նրա եղբորն այսօր Բաղրամյան 26-ի դիմացից ոստիկաններն առևանգել են միայն այն բանի համար, որ նրանք համարձակվել է բարձրաձայնել իրենց քեռու՝ բուժծառայության փոխգնդապետ Հրանտ Պապիկյանի և մեր մյուս գերեվարված հայրենակիցների խնդիրը։

Հրանտ Պապիկյանը Զինված ուժերի ռազմաբժշկական ծառայության ամենափորձառու բժիշկներից էր, ով 44-օրյա պատերազմի օրերին Հադրութի ուղղությամբ տեղակայված զորամիավորման բուժծառայության պետն էր։

Պաշտոնական դիրքն իհարկե չէր զսպում Պապիկյանին՝ մարտերի ամենաթեժ ուղղություններ մեկնելու և անձամբ վիրավորներին մարտադաշտից դուրս բերելու համար։ Նման դեպքերից մեկը ողբերգությամբ ավարտվեց, Պապիկյանը նախ վիրավորվում է, ապա գերեվարվում և մինչև հիմա նրա վերաբերյալ որևէ տեղեկություն չկա։

Սակայն Հայաստանում առկա բարոյական ճգնաժամի պայմաններում ոստիկանության որոշ անուղեղներ իրենց թույլ են տալիս Տաթևին ու նրա եղբորն ամենակեղտոտ միջոցներով բերման ենթարկել։

Իրավապահներին անիմաստ կոչեր և հորդորներ չեմ հղի, արդեն պարզ է, թե ով ով է և ում է ծառայում։

Իր հերթին Տաթեւ Սողոյանը գրառում է արել՝ նշելով. «Դուրս եմ եկել արդեն, լավ եմ: Շնորհակալ եմ բոլոր արձագանքների համար:

Ես Բաղրամյան 26-ի դիմաց կանգնել էի գերիներին վերադարձնելու մասին պաստառով: Այն ինչ տեղի ունեցավ հետո չի տեղավորվում իրավական ու բարոյական ոչ մի տրամաբանություն մեջ»: