Մտովի ցեղասպանությունից մազապուրծ եղածների հետ եմ, ում ժամանակին հյուրընկալեց Ֆրանսիան. Մակրոնը նամակ է հղել Արմեն Սարգսյանին

Ֆրանսիայի Հանրապետության նախագահ Էմանուել Մակրոնը նամակ է հղել ՀՀ նախագահ Արմեն Սարգսյանին Հայոց ցեղասպանության 106-րդ տարելիցի կապակցությամբ: Այս մասին հայտնում է Հայաստանում Ֆրանսիայի դեսպանատունը:

«Պարոն Նախագահ, Թանկագին Արմեն

Հայոց ցեղասպանության 106-րդ տարելիցին իմ բոլոր մտքերն ուղղված են դեպի պատմության զրկանքները կրած Հայաստանը։ Մտովի հայ ժողովրդի, ցեղասպանությունից մազապուրծ եղածների եւ փախստականների հետ եմ, ում ժամանակին հյուրընկալեց Ֆրանսիան, եւ որոնց ժառանգները կերտեցին մեր երկիրը։ Մենք երբեւէ չենք մոռանա։

Կցանկանայի հույզերով եւ արժանապատվությամբ լի այս օրը լինել ձեզ հետ: Եվրոպայի եւ արտաքին գործերի նախարարին կից Զբոսաշրջության, արտերկրի ֆրանսիացիների եւ ֆրանկոֆոնիայի հարցերով պետքարտուղար պարոն Ժան-Բատիստ Լըմուանին խնդրել եմ ինձ ներկայացնել Երեւանում Ցեղասպանության ոգեկոչման արարողությունների ընթացքում։

Ինչպես եւ հանձն էի առել, 2019թ.-ից ապրիլի 24-ը Ֆրանսիայում պաշտոնապես ճանաչվել է Հայոց ցեղասպանության հիշատակի օր: Ֆրանսիայում ամենուր՝ ի հեճուկս համավարակով պայմանավորված սահմանափակումների, կնշվի մեր հանրապետական օրացույցում ընդգրկված այդ օրը։ Ավելի քան ցանկացած մեկ այլ օր, այս ապրիլի 24-ին մեր երկու ժողովուրդները համախմբված են նույն հիշատակի շուրջ։

Անցյալը հիշելը՝ ընդունելով ճշմարտությունը, հանգուցյալներին հարգանքի տուրք մատուցելը եւ ապրողների հիշողությունը հարգելը մեր պարտքն է՝ կանխելու համար մոռացումը, ժխտումը, սուտը։ Պատմության ընթացքում ձեր կողքին հանձնառու լինելով՝ մենք նաեւ հանձնառու ենք ապագայի հանդեպ այսժամ, երբ Ձեր երկիրն անցավ տարածաշրջանը պատուհասած մահաբեր հակամարտության միջով, որտեղ չափազանց շատ արյուն է հեղվել։ Պետք է կերտել նոր՝ խաղաղության, բարգավաճման եւ հաշտության էջ։

Հանուն արդարության եւ ճշմարտության պայքարը, որ ձեր կողքին Ֆրանսիան մղել է եւ կշարունակի մղել, չի դադարի, քանզի այն միայն հայերի պայքարը չէ։ Այն Ֆրանսիայի Հանրապետության եղբայրության սկզբունքի հիմքում է։

Տխրության, բայց նաեւ հույսի այս օրը, երբ միասին հիշում ենք մարտիրոսված ժողովրդի սոսկալի տառապանքները, Ֆրանսիային եւ Հայաստանին միավորում են բարեկամությունը եւ եղբայրությունը։

Հաճեցեք ընդունել, պարոն Նախագահ, հարգանացս գերագույն հավաստիքը»։

Խորին հարգանքով՝

Էմանուել ՄԱԿՐՈՆ»: