Փաստաբանական գրասենյակի ղեկավարը՝ «Այբ» հիմնադրամի հաղթանակի մասին

2021 թվականի դեկտեմբեր ամսին հայտնի դարձավ, որ «Այբ» Կրթական հիմնադրամի կողմից պետական միջոցների չարաշահման վերաբերյալ քրեական գործը կարճվել է՝ հանցակազմի բացակայության հիմքով: «Այբ» Կրթական հիմնադրամը հայտարարություն տարածեց և մանրամասներ ներկայացրեց այս խայտառակ քաղաքական գործի վերաբերյալ։ Հաշվի առնելով, որ «Այբ» Կրթական հիմնադրամի պաշտպանությունն իրականացրել է «Ջեյ-Փի» Փաստաբանական գրասենյակը որոշ հարցեր ենք ուղղել նույն գրասենյակի տնօրեն, փաստաբան Իրմա Ճաղարյանին։

• Տիկին Ճաղարյան, արդյո՞ք հենց սկզբից եք ստանձնել «Այբ» կրթական հիմնադրամին վերաբերող քրեական գործով պաշտպանությունը, թե այլ փուլում։
• «Ջեյ-Փի» Փաստաբանական գրասենյակի փորձառու փաստաբանական թմի կողմից հենց անմիջապես ՀՀ դատախազության կողմից տարածված հայտարարության պահից ստանձվեց գործով պաշտպանությունը։ Նշեմ, որ ընդհանուր առմամբ քրեաիրավական որևէ հանգամանք առկա չէր և դա ակնհայտ էր բոլորի համար, սակայն ցանկացած քրեական գործում չափազանց կարևոր է հենց սկզբից մարտավարության մշակումը, ինչը կատարվեց։ Այս գործով մեր կողմից իրացվեցին տարբեր փաստաբանական և պաշտպանության միջոցներ, այդ թվում՝ հենց մեր կողմից հաղորդման ներկայացումը, վարչական դատավարության կարգով պետական մարմինների գործողությունների բողոքարկումը և այլն։
• Ինչպիսի քննչական գործողություններ էին կատարվել այս գործով։
• Քննչական մարմնի կողմից շուրջ մեկ տարի տևած քննության արդյունքում, իրականացվել էին իրապես բազմաթիվ քննչական գործողություններ։ Չափազանց մեծ ծավալով հարցաքննություններ էին իրականացվել և դրանց արդյունքները փաստացի կրկին հաստատում էին այն, որ «Այբ» կրթական հիմնադրամը և համայնքի ներկայացուցիչները բացառապես իրավաչափ գործունեություն են իրականացրել՝ նպատակ ունենալով կրթական որակը փոխել Հայաստանում: Շատ կարևորում եմ, որ չնայած այս հետապնդմանը, Հիմնադրամը մշտապես գտնվել է իր բարձունքում։ Օրինակ՝ ես կարևորում էի, որ ցանկացած փաստաթուղթ, որը պահանջվում էր քննիչի կողմից սեղմ ժամկետներում տրամադրվեր, հենց այդպես էլ լինում էր։

Առհասարակ, ցանկացած փաստաբանի և փաստաբանական գրասենյակի համար առավել դրական է, երբ քրեական գործի քննությունը հասնում է իր տրամաբանական ավարտին հենց նախաքննության փուլում, այդպես եղավ այս դեպքում և որոշում կայացվեց քրեական հետապնդումը դադարեցնելու վերաբերյալ և արձանագրվեց, որ «Այբ» կրթական հիմնադրամի և դրա ղեկավար կազմի գործողություններում հանցակազմի որևէ տարրեր չեն հայտնաբերվել:

Անկեղծորեն, դրական իմաստով կարևորում եմ քրեական հետապդնման մարմինների վարքագիծը այս գործով, իհարկե մյուս կողմից կարող էր և առհասարակ նման գործ չհարուցվեր։

Այս դեպքով փակագծեր շատ չենք բացի, բայց կան գործողություններ որոնք հենց մենք ենք նախաձեռնել, անկախ այս ելքից և դրա վերաբերյալ տեղեկատվություն հետագայում կտրամադրենք։