Բռնի խոսքի անվան տակ հետևողական կերպով ընդդիմիադիր խոսքն են ցանկանում լռեցնել․ Արամ Հարությունյանի փաստաբան

Չեմ զարմանում, որ այսօր դատախազությունից որևէ մեկը ներկա չէ։ Դատախազությունը միանշանակ է, որ պատվեր է կատարում, որովհետև հիմքեր չկան։ Այս մասին Yerevan.Today-ին ասաց Արամ Հարությունյանի փաստաբան Սերգեյ Հարությունյանը։

Նշենք, որ Վերաքննիչ դատարանում պետք է  ընթանար «Ազգային համաձայնություն» կուսակցության ղեկավար Արամ Հարությունյանին անմեղ ճանաչելու վերաբերյալ առաջին ատյանի դատարանի որոշման դեմ բողոքի քննությունը, սակայն դատախազները չէին ներկայացել դատական նիստին։

Փաստաբանը պնդում է, որ դատախազությունը երկակի ստանդարտներ է կիրառում։ Հիշեցնելով, որ վարչապետի կողմից մուրճի կիրառման վերաբերյալ խնդիր չի տեսել, սակայն Արամ Հարությունյանի հրապարակային խոսքի պարագայում համարվում է բեռնության կոչ։

«Բռնի խոսքի անվան տակ հետևողական կերպով ընդդիմիադիր խոսքն են ցանկանում լռեցնել։ Ես վստահ եմ, որ նմանատիպ փորձեր շատ են լինելու»,- ասաց նա։

Հիշեցնենք, որ դատավոր Դավիթ Բալայանը Արամ Հարությունյանին անմեղ էր ճանաչել՝ հանցակազմի բացակայության հիմքով։

Արամ Հարությունյանին մեղադրանք է առաջադրվել ՀՀ ՔՕ 226.2-րդ հոդվածի 1-ին մասով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը)։ 

Ըստ մեղադրական եզրակացության՝ Youtube կայքէջում 22.12.2020 թվականին տեղադրված «Նիկոլ, դու մեր դասագրքերն ու տոները փոխեցիր» վերնագրով 6 րոպե տևողությամբ տեսանյութում Արամ Հարությունյանը ՀՀ վարչապետ Նիկոլ Փաշինյանի նկատմամբ քաղաքական ու այլ հայացքներով պայմանավորված դիտավորությամբ հնչեցրել է բռնությունը հրապարակայնորեն արդարացնող կոչեր, մասնավորապես՝ տեսաուղերձի ընթացքում նշել է «Նիկոլի հետ հաշվեհարդար տեսնելու պատվերը հայ ժողովրդիննա, Թեհլերյանները հազարավոր են, միլիոնավոր են, Նիկոլ քո ընտանիքի համար, քո ընտանիքի անվտանգության համար որի էստեղ, ծնկաչոք ներողություն խնդրի զոհվածների մայրերից, որովհետև դու պատժվելու ես, եթե չգաս, դու չես կարա փախնես, չես հասցնի փախնես, մենք չենք կարող ամեն հայի ձեռք բռնել, մարդ կա երկու երախայա կորցրել, մարդ կա ընտանիքը, տուննա կորցրել, ոչ մեկը չի կարող էտ մարդուն ձեռքը բռնել, եթե ժամանակին Թեհլերյանին արդարացրեցին, ապա քեզ շանսատակ անողին հերոսի կոչում են տալու»։