«Այս գործընթացի մեջ բավականին շատ հարցականներ կան». Փաստաբանը՝ Դատախազության միջնորդության մասին. 168.am

Ռոբերտ Քոչարյանի փաստաբանական խմբի անդամ Արամ Օրբելյանի խոսքով՝ ՀՀ գլխավոր դատախազության կողմից դատավոր Դավիթ Գրիգորյանին ինքնաբացարկի միջնորդություն ներկայացնելը սպասելի էր։

Նշենք, որ այսօր գլխավոր դատախազը լրագրողների հետ զրույցում նշեց, որ Դավիթ Գրիգորյանին ինքնաբացարկի միջնորդություն են ներկայացրել, որը, ըստ սահմանված կարգի՝ պետք է քննվի առաջին նիստի ժամանակ։

«Առաջ ընկնել և ենթադրություններ անել, թե ո՞ւմ այդ գործը կմակագրվի և ինչպե՞ս,  պնդումներ չանենք։ Այս պահին շատ ավելի լուրջ խնդիր կա՝ մեր իմանալով, բայց այժմ ճշտում ենք, գործը չի ուղարկվում Առաջին ատյանի դատարան, որոշել են, մեջբերում եմ՝ գործավարության կարգով սպասենք, մինչև բողոքարկման ժամկետն ավարտվի։ Նման գործավարության կարգ ինձ դեռ հայտնի չէ, բայց չեմ էլ պնդում, որ չկա, հիմա փորձում ենք հասկանալ՝ ուղարկո՞ւմ են, թե՞ ոչ։ Քանի որ գործը պետք է ուղարկվի Առաջին ատյանի դատարան, որպեսզի այնտեղ ընթացք տրվի, քանի որ անձի ազատության հետ կապված խնդիր կա քննելու»,- 168.am-ի հետ զրույցում ասել է Արամ Օրբելյանը։

Նրա խոսքով՝ վերը նշած խնդիրը կարգավորելուն զուգահեռ՝ կփորձեն հասկանալ, թե ինքնաբացարկի ի՞նչ միջնորդություն է Դատախազությունը ներկայացրել, ի՞նչ հիմքերով ու ինչի՞ հիման վրա, և արդյո՞ք դրա հիմքում դրել են միայն  Ռոբերտ Քոչարյանի խափանման միջոց կալանքը փոխելու որոշման փաստը, թե՞ այլ հանգամանք։

«Այս գործընթացի մեջ բավականին շատ հարցականներ կան» ,- շեշտեց Արամ Օրբելյանը։ Նա նաև տեղեկացրեց, որ մինչև այս պահը դեռևս Վճռաբեկ դատարան չեն դիմել։

Հիշեցնենք, որ հունիսի 25-ին  ՀՀ Վերաքննիչ քրեական դատարանը  ՀՀ երկրորդ նախագահ Ռոբերտ Քոչարյանին կրկին կալանավորելու որոշում կայացրեց։