Մարդու իրավունքների պաշտպանը այցելել է Ռոբերտ Քոչարյանին

ՀՀ մարդու իրավունքների պաշտպանը կալանավորման հաջորդ օրն այցելել է ՀՀ երկրորդ նախագահ Ռոբերտ Քոչարյանին, նրա հետ առանձնազրույց է ունեցել: Այս մասին լրագրողների հետ ճեպազրույցում ասաց Արման Թաթոյանը։

 «Քննարկել ենք մարդու իրավունքների պաշտպանի իրավասությանն առնչվող բոլոր հարցերը։ Համապատասխան գրություններ, հարցումներ ենք նախապատրաստել այն հարցերի շուրջ, որոնք բարձրացվել են առանձնազրույցի արդյունքում»,- ասաց նա։

Հարցին, թե կոնկրետ ինչի՞ց է բողոքել Ռոբերտ Քոչարյանը, ՄԻՊ Արման Թաթոյանը պատասխանեց.

 «Այս պահին չեմ կարող դրանք բարձրաձայնել, որովհետև քննարկման ընթացակարգ է գնում և ես պարտականություն ունեմ նաև երաշխավորելու առանձնազրույցի գաղտնիությունը։ Քննարկման, կապի մեջ ենք նաև փաստաբանների հետ»։

 Թաթոյանն ասաց նաև, թե մարդու իրավունքների պաշտպանի համար որևէ նշանակություն չունի այն հանցանքը, որի մեջ մարդը մեղադրվում է կամ այն հասարակական ընկալումները, որ կան այդ մարդու հետ կապված։

 «Ես պարտավոր եմ կատարել իմ գործառույթը։ Ես ոչ թե աշխատում եմ ինչ-որ մեկին դուր գալու համար, այլ կատարում եմ իմ գործառույթը։ Դա միշտ է եղել այդպես և այդպես են արել մարդու իրավունքների բոլոր պաշտպանները», - նկատեց Արման Թաթոյանը։

 Պաշտպանն ասաց նաև, որ Ռոբերտ Քոչարյանը որևէ դժգոհություն չի հայտնել քրեակատարողական հիմնարկի ծառայողների վերաբերմունքի հետ կապված։