«Սասնա ծռեր»-ի հարցը՝ դարձյալ օրակարգում

Բողոքի ակցիա անողները պետք է հաշվի առնեն այլոց իրավունքները: Այս մասին մայիսի 18-ին լրագրողների հետ զրույցում ասաց ՀՀ արդարադատության նախարար Արտակ Զեյնալյանը՝ անդրադառնալով «Սասնա ծռեր»-ի ազատ արձակման պահանջով բողոքի ցույցերին:

«Յուրաքանչյուրը պետք է հաշիվ տա իրեն և իր գործողություններն այնպես անի, որ չվնասի ընդհանուր շահը: Եթե մեր մտքով ինչ որ բան է անցնում, չպետք է բացառել, որ դա կարող է հակասել ուրիշների կարծիքներին»,- ասաց նորանշանակ նախարարը:

Հիշեցնենք, որ «Սասնա ծռեր»-ի աջակիցները փողոցներ են փակում՝ պահանջելով նրանց ազատ արձակումը:

Մայիսի 17-ին կոչով հանդես եկավ վարչապետ Նիկոլ Փաշինյանը՝ առաջարկելով դադարեցնել բողոքի բոլոր ցույցերը: Փաշինյանը մայիսի 17-ին՝ կառավարության նիստից առաջ, լրագրողներին ասաց, թե չի կարող բանտախցերի դուռը բացել ու դուրս հանել, պետք են ընթացակարգեր:

Վարչապետը նույն օրը երեկոյան հանդիպել է «Սասնա ծռեր» խմբի աջակիցների պատվիրակության հետ: Արդյունքների մասին մանրամասներ հայտնի չեն: