«Justice & Protection» իրավաբանական ընկերությունը համընդհանուր հայտարարագրման մասին

«Justice & Protection» իրավաբանական ընկերությունը գրում է․

«Ինչպես հայտնի է Հայաստանում 2023-2026թթ․ փուլային եղանակով ներդրվում է ֆիզիկական անձանց եկամուտների հաշվարկ- հայտարարագրման համակարգը։

2024 թվականի համար մինչև 2025 թվականի մայիսի 1-ը հարկային մարմին եկամտային հարկի տարեկան հայտարարագրեր պետք է ներկայացնեն ինչպես նախորդ տարվա՝ 2023 թվականի հաշվետու տարվա համար հայտարարագիր ներկայացնողները, այնպես էլ՝ ՀՀ ռեզիդենտ հանդիսացող այն ՀՀ քաղաքացիները, որոնք՝

• 2024 թվականի ընթացքում համարվել են վարձու աշխատող,
• 2024 թվականի ընթացքում ստացել են քաղաքացիաիրավական պայմանագրերի շրջանակում հարկվող եկամուտ,
• 2024 թվականի դեկտեմբերի 31-ի դրությամբ զբաղեցրել են «Հանրային ծառայության մասին» ՀՀ օրենքով սահմանված պետական ծառայության, համայնքային ծառայության և/կամ հանրային պաշտոն,
• 2024 թվականի դեկտեմբերի 31-ի դրությամբ հանդիսացել են 2023թ.-ի արդյունքներով 1 մլրդ դրամ և ավելի համախառն եկամուտ հայտարարագրած ՀՀ ռեզիդենտ առևտրային կազմակերպության մասնակից,
• 2024 թվականի ընթացքում «Փողերի լվացման և ահաբեկչության ֆինանսավորման դեմ պայքարի մասին» ՀՀ օրենքով համարվել են իրավաբանական անձի իրական շահառու,
• 2024 թվականի ընթացքում ստացել են 20 մլն դրամի չափով կամ ավելի փոխառություն։

Կարևոր է նշել, որ այս համակարգը բացառապես տարվա ընթացքում հարկվող եկամուտի հայտարագրմանն է վերաբերում, բայց ներառում է նաև նվիրատվությունները և այլ տվյալներ:

Ֆիզիկական անձանց կողմից սահմանված կարգով հայտարարագիր չներկայացնելն առաջացնում է նախ՝ նախազգուշացում լիազոր մարմնի կողմից: Այնուհետև ըստ հայտարագրման պարտականություն ունեցող անձի կարգավիճակի տուգանքի նշանակում ըստ Վարչական իրավխախտումների վերաբերյալ օրենսգրքի: Պատասխանատվության միջոցների վերաբերյալ հարցերին մեր կողմից անդրադարձ կկատարվի նաև առանձին հրապարակմամբ:

Ինքնին նմանատիպ մեծ համակարգերի ներդրումները նախկինում հաճախ դարձել են սահմանադրական վերահսկողության առարկա, ինչպես օրինակ կուտակային կենսաթոշակային համակարգը, տվյալ նոր համակարգի դեպքում` Սահմանադրական դատարանի որոշում առկա չէ»։