Դավիթ Անանյանի մորաքրոջ որդիները՝ ՊԵԿ պաշտոնյաներ

«168 ժամ» թերթը գրում է.

Մամուլը բազմիցս գրել է այն մասին, որ Պետական եկամուտների կոմիտեի նախագահ Դավիթ Անանյանը (ՊԵԿ) իր ընկեր-բարեկամ-խնամիներով է լցրել համակարգը։

Անգամ Ազգային ժողովի «Իմ քայլը» խմբակցության պատգամավոր Սոֆյա Հովսեփյանն ԱԺ ամբիոնից բարձրաձայնել էր այն մասին, որ շարունակ նույնաբովանդակ բողոքներ է ստանում Պետական եկամուտների կոմիտեում թափուր հաստիքների համալրման մրցույթների մասին։ Պարբերաբար տեղեկություններ են ստացվում այն մասին, որ այս կամ այն պաշտոնում ՊԵԿ-ում նշանակվել է Դավիթ Անանյանի մտերիմներից մեկը։

Հայտնի է, որ ՊԵԿ ստուգումների կազմակերպման և դիտարկման վարչության համալիր հարկային ստուգումների թիվ 6 բաժնի պետ Արամ Վազգենի Շաքարյանը ՊԵԿ նախագահի մորաքրոջ որդին է։

Ըստ մեր տեղեկությունների՝ Դավիթ Անանյանը հիմա էլ մորաքրոջ մյուս որդուն՝ Արամ Շաքարյանի եղբորն է աշխատանքի տեղավորել իր ղեկավարած գերատեսչությունում։

Արթուր Վազգենի Շաքարյանը նշանակվել է ՊԵԿ ներքին անվտանգության վարչության տեղեկատվական և տեխնիկական անվտանգության ապահովման բաժնի գլխավոր մաքսային տեսուչ։

Այնինչ խոստացվում էր, որ իշխանափոխությունից հետո այլևս ԽԾԲ սկզբունքը չի լինելու աշխատանքի տեղավորման հիմնական ու գերակա պայման։

Մանրամասն՝ «168 ժամ»  թերթի այսօրվա համարում