ՊԵԿ-ի խոշոր գնումը՝ Մարգարայի մաքսակետի կառուցման համար. «Հրապարակ»

«Հրապարակ» թերթը գրում է. «Մոտ քսան օր առաջ ՀՀ պետական եկամուտների կոմիտեն շուրջ 630 միլիոն դրամի պայմանագիր է կնքել հայ-թուրքական սահմանին գտնվող Մարգարայի մաքսակետի կառուցման կապալառու «Արտկոն» ՓԲԸ-ի հետ՝ երկրորդ փուլի աշխատանքները շարունակելու համար։ Նշենք, որ այս ընկերությունը մաքսային կետի կառուցման շինարարական աշխատանքներն իրականացնող գլխավոր կապալառուն է, որին ծառայությունների պատվերը տրվել է հրատապ, մեկ անձից գնման ընթացակարգով։

Անհասկանալի է, թե ինչով է պայմանավորված մեկ անձից կատարված այս խոշոր գնումը, հատկապես երբ 2021-ից մեկնարկած հայ-թուրքական հարաբերությունների կարգավորման գործընթացում շոշափելի առաջընթաց չկա, իսկ Մարգարայի կամրջի բացումը չի նշմարվում մոտ ապագայում։ 3 տարվա ընթացքում երկու երկրների հարաբերությունները կարգավորելու նպատակով Հայաստանի եւ Թուրքիայի հատուկ ներկայացուցիչները հանդիպել են ընդամենը 4 անգամ՝ 2022թ. հունվարի 14-ին, փետրվարի 24-ին, մայիսի 3-ին եւ հուլիսի 1-ին։ Մարգարայի կամրջի մոտալուտ բացման մասին իշխանական միֆերը հօդս ցնդեցին, երբ այս տարվա փետրվարին Թուրքիայում տեղի ունեցած ավերիչ երկրաշարժից 3 օր անց Թուրքիան միայն օգնություն ստանալու համար բացեց ու անմիջապես փակեց Մարգարայի կամուրջը։

Հիշեցնենք, որ Նիկոլ Փաշինյանի որոշմամբ՝ Հայաստանը փետրվարի 11-ին եւ 15-ին հարյուր տոննայից ավելի մարդասիրական օգնություն ուղարկեց թուրք ժողովրդին՝ հատելով հայ-թուրքական Մարգարա-Ալիջան (Իգդիր) ցամաքային սահմանը»:

Առավել մանրամասն թերթի այսօրվա համարում