Ո՞վ կվերջանա կորոնավիրուսի հետ ու կհայտնվի քաղաքական աղբանոցում

Մեզ թվում էր, որ գոնե կորոնավիրուսը միակ թեման է, որով Նիկոլ Փաշինյանը չի կարող մեղադրել նախկիններին։ Բայց նա հայտնի «խառտոցի» անեկդոտի պես, ամենուր գտնում է մեղավոր իր չկայացվածության, անկարողության, տապալման մեղքը բարդելու համար։

«ՀՀ-ում դաշտը կարելի է բաժանել երկու մասի. մարդիկ, որոնք շահագրգռված են, որ կորոնավիրուսի վարակը հնարավորինս շուտ հաղթահարվի, և մարդիկ, որոնք շահագրգռված են, որ կորոնավիրուսի վարակը հնարավորինս տարածվի և հնարավորինս վատ  ընթացք ստանա: Դրանք հայտնի քաղաքական շրջանակներն են, բայց ես ուզում եմ ասել, որ այդ շրջանակները կորոնավիրուսի վարակի ավարտի հետ ավարտվելու են․․․  Նրանք նետվելու են Հայաստանի քաղաքական պատմության աղբանոցը․․․»: Այո, խոսքերի հեղինակը Նիկոլ Փաշինյանն է, որը կորոնավիրուսի դեմ (չ)պայքարի առաջին իսկ օրից սկսեց այն ծառայեցնել քաղաքական նպատակների իրականացմանն ու աչոկներ հավաքելուն։

Նիկոլ Փաշինյանը մնաց վիրուսի տակ, չհաղթահարեց համաճարակը, որովհետև երկու տարում չուժեղացրեց պետական համակարգի իմունիտետը, չկառուցեց, զբաղվեց միայն սխալներ փնտրելով, մեղավորներ փնտրելով կամ նշանակելով, չպատրաստվեց որևէ բանի։ Նա երկու տարի իր պորտաբուծության մեղքը բարդեց նախկինների վրա՝ լավագույնս օգտվելով նույն նախկինների թողած ռեսուրսներից՝ թե՛ անձնական բարեկեցություն հաստատելու, թե՛ թիմին պահելու մասով։

Ինչպես և սպասվում էր, Նիկոլ Փաշինյանը երկիրը բերեց կատարյալ կռախի առաջ, բայց էլի բողոքում է ուրիշներից։

Ո՞վ է մեղավոր․ եթե մեղավորներ ենք փնտրում, ուրեմն փնտրենք ազնվորեն, տեսնենք նախկինների կամ «հայտնի շրջանակների» մեղքն ինչում է․

• Հայաստանում կորոնավիրուսը եղել է փետրվար ամսից՝ ըստ համաճարակաբանի․ ստացվում է Նիկոլ Փաշինյանը թաքցրել է, որ քարոզարշավ անի և իրենով անի Սահմանադրական դատարանը։
• Հայաստանում հաստատված դեպքեր կային, Նիկոլ Փաշինյանը շարունակում էր քարոզարշավը։
• Նիկոլ Փաշինյանն անլրջություն մտցրեց քաղաքացիների մեջ՝ ասելով՝ «կորոնավիրուսն ո՞ւմ շունն է, պինցետով կհանենք»։
• Նիկոլ Փաշինյանը մարդկանց չտվեց ֆինանսական օգնություն, որ տանը նստեն, ու յուրաքանչյուրը դուրս եկավ հաց վաստկելու՝ տարածելով համավարակը։
• Նիկոլ Փաշինյանը բիզնեսին չտվեց աջակցություն, որ չսննկանա։
• Նիկոլ Փաշինյանը հայտարարեց արտակարգ դրություն, բայց անձամբ խախտեց այն։
• Նիկոլ Փաշինյանի քաղաքականության պատճառով կարող կադրերը լքեցին պետական կառավարման համակարգը։
• Նիկոլ Փաշինյանը համավարակի այս ընթացքում վավերացրեց «Լանզարոտեի» աղմկահարույց կոնվենցիան՝ մարդկանց դժգոհությանը հաշվի չառնելով։
• Նիկոլ Փաշինյանի կառավարության ներկայացրածով Ազգային ժողովն ընդունեց գույքահարկի բարձրացման, ապօրինի գույքի բռնագանձման, բանկային գաղտնիքի մասին օրենքները, որոնք յուրաքանչյուրը պատճառ են, որ մարդիկ վաճառեն ունեցվածքը, գնան երկրից, իսկ ներդրողները դադարեցնեն իրենց աշխատանքը կամ ընդհանրապես չանեն դրանք։
• Նիկոլ Փաշինյանը որոշեց համընդհանուր հայտարարագրում անել և հաշվել մարդկանց բոլոր կոպեկները։
• Նիկոլ Փաշինյանը համավարակի ընթացքում միլիոնավոր դոլարների պարգևավճարներ բաժանեց։
• Նիկոլ Փաշինյանը, ըստ մամուլի չհերքված հրապարակումների ու Միքայել Մինասյանի չհերքված հայտարարության, զբաղված է սիգարետի ապօրինի առևտրով, զենքի ու ադմանդի միջազգային առևտրով։
• Արսեն Թորոսյանի գործունեության ընթացքում համավարակի ընթացքում շատ բժիշկներ աշխատանքից ազատման դիմում են գրում։
• Նիկոլ Փաշինյանը, չկողմնորոշվելով իրավիճակում, փակվեց իր առանձնատանը և հայտարարեց, թե հիվանդ է կորոնավիրուսով, և հենց տեղեկացավ, որ իշխանությունը ոտքերի տակից փախչում է, անմիջապես հայտարարեց, թե առողջացել է։ Ընտանիքով։
• Նիկոլ Փաշինյանն առանց սոցիալական հեռավորության, առանց պաշտպանվելու Արցախում մասնակցում էր նախագահի երդմնակալության արարողությանը և կերուխումին, որից հետո հայտարարեց, թե հիվանդացել է կորոնավիրուսով ու գուցե պատճառ է դարձել վարակի տարածմանը։
• Տասնյակ հիվանդանոցներ պատրաստ սպասել են, որ պետությունը նրանց ներգրավի կորոնավիրուսի դեմ պայքարին, բայց այդպես էլ պետությունը չի դիմել, չնայած որ մյուս հիվանդանոցները սպառել են ազատ տեղերը։ Փոխարենը Փաշինյանի և առողջապահության նախարարի սիրելի հիվանդանոցները փող են աշխատել։
• Կառավարությունը չի ապահովել մարդու կյանքի իրավունքը․ Հայաստանում Արտակարգ դրության պայմաններում կորոնավիրուսից մարդիկ են մահացել՝ չստանալով բուժօգնություն, այն դեպքում, երբ կային ազատ հիվանդանոցներ։
• Վրաստանն օգնություն առաջարկեց՝ ը դիմեց օգնության առաջարկով՝ ունենալով հաջողված փորձ, իշխանությունը չընդունեց։

Եվ այլն և այլն։ Հիմա այս բոլորի մեջ ի՞նչ կապ ունեն նախկիններն ու «հայտնի շրջանակները»։ Ո՞ր կետի հետ ունեն առնչություն։ Հիմա ո՞վ է շահագրգռված, որ համավարակը տարածվի։ Ի՞նչ է արել Փաշինյանը, որպես վարչապետ, համավարակը կանխարգելելու համար, որ իրեն խանգարել են։ Ընդհակառակը, Նիկոլ Փաշինյանը բոլոր շրջանակներից ստացել է խորհուրդներ, թե ոնց անի, որ սա չտարածվի, փորձել են աջակցել, բայց բոլորին արհամարհել է, փորձել է իր ու թիմի կարճ ուղեղով լուծել հարցը։ Չի ստացվել։

Փաշինյանն իր անգործությունը, անգրագիտությունը ուզում է ծածկել էլի նախկինների վրա բոչկա գլորելով։ Բայց դա էլ չի աշխատում, մարդկանց սպասելիքներն այլ են։

Հայաստանում կորոնավիրուսի տարածմամբ միակ շահագրգռված անձը Նիկոլ Փաշինյանն է․ հենց նա է արտակարգ դրությունը շարունակում, որպեսզի մարդիկ իր հակապետական, հակամարդկային որոշումների դեմ բողոքի ակցիաներ չանեն։

Պարոն Փաշինյան, իմ կարծիքով, դուք արդեն վերջացած եք, որպես իշխանություն։ Իհարկե, կարող եք էլի պաշտոնյաներ հանել-դնել, փոխատեղել, բայց դուք չունեք իշխանության պահպանման ամենից կարևոր 2 պայմաններից և ոչ մեկը․ առաջինը՝ ժողովրդի աջակցություն, երկրորդը՝ խելք և կորոնավիրուսի հետ կնետվեք աղբանոցը՝ թե՛ քաղաքական, թե՛ պատմության։

 Սևակ Հակոբյան