ԱԱԾ-ն բռնում է ֆեյքերին միայն Նիկոլ Փաշինյանի հանձնարարությա՞մբ

Մայիսի 2-ին դիմել էինք ԱԱԾ, քանի որ մեր հրապարակած տեսանյութերից մեկի հերոսի հետևից էր ընկել Նիկոլ Փաշինյանի օգտին աշխատող «Lusine Martirosyan» անունով գրանցված ֆեյք օգտատերը, սպառնալիքներ տեղացել, վիրավորել։

Քաղաքացին զանգել ու ահազանգում էր, որ այլ տարբերակ չունի, քան ինքնասպան լինելը։ Բազմիցս խնդրեցինք, որ այդ քայլին չգնա, ասացինք դիմի ոստիկանություն։ Պատասխանեց, որ դիմել է ոստիկանություն, պատասխանել են, թե ամեն ֆեյքի հետևից չեն կարող ընկնել։

Yerevan.Today-ը դիմեց ԱԱԾ։

Պատասխանեցին, թե ֆեյքերով չեն զբաղվում, հիշեցրինք, որ լավ էլ զբաղվում են։

Եվ հիմա ԱԱԾ-ն պաշտոնապես պատասխպանում է, որ հարցի լուծումն ԱԱԾ իրավասություններից դուրս է և նամակը վերահասցեագրել է ՀՀ ոստիկանության քրեական ոստիկանության գկխավոր վարչություն։

Ի՞նչ խաղ էր սա։

Հիշեցնեմ, որ 2019թ․ ապրիլի 4-ին, վարչապետ Նիկոլ Փաշինյանը ԱԱԾ ղեկավարին հանձնարարեց «պայքար» սկսել մամուլում ֆեյք լուրերի ու սոցցանցերում ֆեյքերի դեմ: Ասաց, թե որոշ հանցավոր շրջանակներ միլիոններ են ծախսում սոցիալական ցանցերում, լրատվամիջոցներում, հասարակական կարծիքի մանիպուլյացիաներ անելու համար: 

ԱԱԾ-ն անմիջապես՝ մեկ օր անց բռնեց «Դուխով Հայաստան բաց հասարակություն» ֆեյք էջն աշխատացնողին։

Կամ «Դիանա Հարությունյան» անվամբ ֆեյսբուքյան էջում հունվարի 3-ին տեղեկություն էր հրապարակել այն մասին, թե վարչապետ Նիկոլ Փաշինյանը շնորհավորել է ԱՄՆ նախագահին՝ իրանցի բարձրաստիճան զինվորական Քասեմ Սուլեյմանիի սպանության առիթով»։ Նիկոլ Փաշինյանի հանձնարարությւամբ, հունվարի 5-ին այդ մարդը ձերբակալվեց։

Հիմա ինչպե՞ե եղավ, որ ԱԱԾ-ն զբաղվում է ֆեյքերով, որոնցով զբաղվել հանձնարարում է Փաշինյանը, բայց ֆեյքերը, որոնք գործում են հօգուտ Փաշինյանի, ԱԱԾ-ն անելիք չունի։ Այո, այսօր հանցավոր շրջանակներ կան, որոնց «հորդորով» Նիկոլ Փաշինյանի նկարով կամ առանց նրա նկարի ֆեյքեր են գործում և հայհոյում բոլոր նրանց, ովքեր դեմ են Նիկոլ Փաշինյանին կամ, հասարակական տրամադրություն են փորձում ցույց տալ հօգուտ Փաշինյանի։

Գուցե ԱԱԾ-ն ուզում էր ասել, թե Փաշինյանի հանձնարարության դեպքում ազգային անվտանգության խնդիր էր, իսկ քաղաքացուն ինքնասպանության հասցնելը՝ ոչ։ Հնարավոր է։ 

Ի դեպ, այդ «Lusine Martirosyan» ֆեյքով գուցե ոչ էլ կարող եք զբաղվել, մեր հրապարակումներից հետո արդեն ջնջել է էջը, հիմա երևի նոր անուն է բացել ու թունավորում է այլ անձանց կյանքը։