31 12 2018

ՀՀ-ի համար ռուսական գազի գինը կկազմի 165 դոլար 1000խ/մ-ի համար

ՀՀ-ի համար ռուսական գազի գինը կկազմի 165 դոլար 1000խ/մ-ի համար

Մոսկվայում կայացել է «Գազպրոմ» ընկերության նախագահ Ալեքսեյ Միլերի և ՀՀ փոխվարչապետի ժամանակավոր պաշտոնակատար Մհեր Գրիգորյանի աշխատանքային հանդիպումը:

Ինչպես նշվում է ընկերության պաշտոնական կայքում, 2019թ. Հայաստան մատակարարվող գազի գնի վերաբերյալ «Գազպրոմ էքսպորտ»-ի և «Գազպրոմ Արմենիա»-ի միջև կնքված պայմանագրին ի լրումն ստորագրված համաձայնագրի համաձայն՝ 2019թ. հունվարի 1-ից Վրաստանի և Հայաստանի սահմանին ռուսական գազի գինը կկազմի 165 դոլար 1.000 խ/մ-ի համար:

«Գազպրոմ Արմենիա»-ն գազի սակագների հարցով կշարունակի իր աշխատանքը ՀՀ կառավարության համապատասխան պետական օրգանների հետ:

Նշվում է, որ տարեկան մինչև 2.5 մլրդ խ/մ ծավալով գազի մատակարարման պայմանագիրը «Գազպրոմ էքսպորտ»-ի և «Գազպրոմ Արմենիա»-ի միջև գործում է մինչ 2019թ. ավարտը:

Հիշեցնենք, որ ՀՀ վարչապետի ժամանակավոր պաշտոնակատար Նիկոլ Փաշինյանը ֆեյսբուքյան ուղիղ եթերում հայտարարեց, որ գազի գինը սահմանին թանկանալու է, սակայն հայաստանյան սպառողների համար կմնա նույնը:

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ