27 10 2021

Մեկ տարի անց էլ ոչինչ չի փոխվել․ տուն ու տեղ կորցրած նույն կարգավիճակում ենք․ տեղահանված արցախցի



Այսօր  կառավարության շենքի դիմաց էին հավաքվել Արցախից տեղահանված բնակիչները։ 44-օրյա պատերազմի հետևանքով  տուն ու տեղ կորցրած,  և  հարկադրաբար իրենց բնակատեղիները լքած  ընտանիքներն այսօր  չունեն ո՛չ մշտական բնակության վայր, ոչ էլ՝ կարգավիճակ։

«Խոսք են տվել, որ լինելու են 25-50 հազարական դրամները։ Երկու-երեք օրը մեկ սոցապ փոխնախարարների մակարդակով  լրատվամիջոցներով  ասում են որոշումը կա, բայց չգիտեմ ինչո՞ւ՝  ծրագիրը չկա, մենք էլ երեք ամիս է չենք կարողանում բնակարանների վարձը տանք։ Մի մասին արդեն, հյուրանոցներից, հյուրատներից ստիպողաբար  հանում են , մենք մեկ տարի  առաջ ինչպես  եղել ենք տուն ու տեղ կորցրած, նույն կարգավիճակում ենք , մեր կյանքում ոչինչ չի փոխվել  և  չգիտենք ինչու են  անմարդկային վերաբերմունք  ցուցաբերում մեր հանդեպ»,-նշեց  Հադրութից տեղահանված  Արթուր Ստեփանյանը։

Հադրութցիներին մտահոգում է նաև իրենց կրագավիճակը։  Ըստ  մեր զրուցակցի, երկու ամսից ավելի է՝  նամակով դիմել են վարչապետին, բարձրաձայնել են իրենց խնդիրների մասին, սակայն մինչև օրս պատասխան չեն տրամադրել։  

Ի դեպ,   տեղահանված արցախցիները կառավարության մոտից քայլերթով կուղևորվեն ՀՀ-ում ՄԱԿ գրասենյակ՝ հայտարարելու, որ ՀՀ-ում կան փախստականներ, ապա շարժվելու են Ֆրանսիայի դեսպանատուն՝ հանձնելու նամակ, որում հումանիտար ապաստան են խնդրելու Ֆրանսիայի նախագահից։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ