28 07 2020

ԿԳՄՍ նախարարը չհանդիպեց դիմորդներին, Հ1-ի տաղավարում մեղադրեց նախկիններին

ԿԳՄՍ նախարարը չհանդիպեց դիմորդներին, Հ1-ի տաղավարում մեղադրեց նախկիններին

Մեդիա պաշտպանը հայտնում է․

«Հանրային հեռուստաընկերության եթերում հուլիսի 27-ին Պետրոս Ղազարյանի հյուրը ԿԳՄՍ նախարար Արայիկ Հարությունյանն էր։ Զրույցը ծավալվեց ընդունելության քննությունների արդյունքների, ԲՈՒՀ-եր չընդունված դիմորդների ու նրանց ծնողների բողոքի ցույցերի, գրականության չափորոշիչների շուրջ։ Պետրոս Ղազարյանն այս անգամ իրեն հատուկ սուր հարցերով աչքի չընկավ, փոխարենը լսում էր և համաձայնվում հյուրի հետ։ Արայիկ Հարությունյանը մեղադրեց նախկիններին, ընդունելության քննությունների արդյունքների շուրջ բարձրացած աղմուկը քաղաքական համարեց՝ նշելով, որ նրանց շարքերում Քոչարյանի աջակիցներ կան, այնուհետ մեղադրեց հետազոտական ու բուհական կենտրոններին կեղծիք տարածելու մեջ․ «Շարունակվում են կեղծիքները մամուլում։ Սոց․ ցանցերում մեղադրանքներ կան՝ մեր հայրենասիրական ոգին կոտրում եք դասականներին հանելով»։

Պետրոս Ղազարյանն էլ հեգնելով ավելացրեց․ «Մեր հիշողությունը, մեր ինքնությունը»։ Արայիկ Հարությունյանն իր հետ տաղավար էր բերել դասագրքերի առաջին էջերի պատճեններ, որոնք ցուցադրելով ասաց․ «Սուտն ու կեղծիքը հնչում են կարևոր հետազոտական և բուհական կենտրոններից։ Սույն պարոնը, որն ամենաշատն է քննադատում, էսպիսի դասագիրք է գրել ժամանակին։ Դավիթ Գասպարյան, իր դասագրքի վերնագրում հայ բառ չկա՝ գրականություն է գրված, նույնը 8-րդ դասարանում, նույնը 9-րդ դասարանում․․․Մի մեծ խումբ, որը նախկինում դասագրքեր է գրել և ապահովել է մեր զարգացումը կամ չզարգացումը դպրոցում, հիմա դուրս է մնացել գործընթացներից»։

Նշենք, որ Պետրոս Ղազարյանի կինը՝ Ժաննա Անդրեասյանը ԿԳՄՍ նախարարի տեղակալն է, գուցե դրանով էր պայմանավորված Հանրայինի մեկնաբանի պասիվությունը»։

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ