Որքա՞ն գումար են ուղարկում հայրենիք ՌԴ աշխատանքի մեկնածները

ԱՊՀ երկրներից Ռուսաստան արտագաղթած քաղաքացիներն իրենց եկամուտների 40%-ն ուղարկում են հայրենիք: Հայաստանից ՌԴ աշխատանքի մեկնած քաղաքացիների բանկային փոխանցումերի ծավալի ցուցանիշն ԱՊՀ երկրների շարքում 4-րդն է: Այս մասին են վկայում Ֆինանսական հետազոտությունների ազգային գործակալության ուսումնասիրության տվյալները, որոնք ներկայացնում է РИА Новости-ն:

Իրենց հայրենի երկիր գումար ուղարկողների մեծ մասը 24-ից 40 տարեկան, միջին մասնագիտական կրթություն ունեցող տղամարդիկ են: Ռուսաստանի Դաշնությունում նրանք աշխատում են շինարարության, առևտրի, կոմունալ տնտեսության ոլորտներում: Հարցվածների կեսն ունի բանկային քարտեր, նրանցից շատերն աշխատավարձը, սակայն, ստանում են առձեռն:

Ընթացիկ տարվա առաջին եռամսյակում Ռուսաստանից Տաջիկստան դրամական փոխանցումների ծավալը, նախորդ տարվա նույն ժամանակաշրջանի համեմատությամբ, աճել է 15.1%-ով:

Այսպես, Տաջիկստանի քաղաքացիները Ռուսաստանից 487 միլիոն դոլար են ուղարկել հայրենիք: ԱՊՀ երկրների թվում Տաջիկստանն այս ցուցանիշով զբաղեցնում է միայն երկրորդ հորիզոնականը, առաջատարն Ուզբեկստանն է: Այս երկրի քաղաքացիները նույն ժամանակահատվածում Ռուսաստանից հայրենիք են ուղարկել 726 միլիոն դոլար:

Կատարված բանկային փոխանցումների ծավալով երրորդ հորիզոնականում է Ղրղզստանը՝ 435 միլիոն դոլար ցուցանիշով, չորրորդ հորիզոնականում Հայաստանն է՝ 209 միլիոն դոլարով: Ադրբեջանցիներն իրենց երկիր են ուղարկել 191 միլիոն դոլար, իսկ ուկրաինացի ներգաղթյալները՝ 158 միլիոն դոլար: Ռուսաստանից Ղազախստան փոխանցվել է 143 միլիոն դոլար: