Երևանի ավագանու նիստը՝ առանց Տարոն Մարգարյանի

Կայացավ Երևանի ավագանու 3-րդ նստաշրջանի վերջին նիստը: Այն վարում էր փոխքաղաքապետ Կամո Արեյանը:

Հարցին, թե ինչու Տարոն Մարգարյանը չի մասնակցում նիստին, փոխքաղաքապետն ասաց, որ առողջական խնդիրներ ունի:

Օրակարգը հաստատելուց հետո ավագանու քննարկմանը ներկայացվեց Եվրոպական Միության «Համայնքի ղեկավարներ հանուն տնտեսական զարգացման» նախաձեռնությանը միանալու վերաբերյալ որոշման նախագիծը: Ներկայացնելով նախագիծը՝ քաղաքապետարանի աշխատակազմի զարգացման և ներդրումային ծրագրերի վարչության պետը մասնավորապես նշեց, որ Եվրոպական Միության այս նոր նախաձեռնությունը գործարկվել է 2017թ. հունվարին «Արևելյան գործընկերության» շրջանակում, որի հիմնական նպատակն է աջակցել գործընկերության երկրների համայնքներին և նրանց ղեկավարներին՝ դառնալու տեղական մակարդակում տնտեսական զարգացման և աշխատատեղերի ստեղծման ակտիվ նախաձեռնող՝ սեփական կարողությունների, տեխնիկական հմտությունների զարգացման և մասնավոր հատվածի ու քաղաքացիական հասարակության հետ համագործակցության ճանապարհով: Երևանի ավագանին քվեարկությամբ հավանություն է տվել ներկայացված նախագծին:

Երևանի ավագանու 3-րդ նստաշրջանի վերջին նիստի օրակարգում ընդգրկված մյուս հարցերը ևս արժանացան ավագանու անդամների հավանությանը: Դրանք վերաբերում էին բնակարանների սեփականության վկայականների տրամադրմանը 5 ընտանիքների:

Ավագանին ավարտեց աշխատանքը և գնաց արձակուրդ: Հաջորդ նիստը կկայանա սեպտեմբերի երկրորդ երեքշաբթի օրը: