Փոխնախարարն անվանեց մեզ թոշակառուներ, ինչ է թե՝ ֆեյսբուքում նյութեր չէինք դնում․ «Գոյ» թատրոնի գեղարվեստական ղեկավար

Արմեն Մազմանյանի անվան բեմարվեստի ազգային, փորձարարական «Գոյ» կենտրոնը ԿԳՄՍ նախարարության նախագծով լուծարման եզրին է, մինչդեռ թատրոնի կազմը պատրաստվում է ամեն կերպ պայքարել այս նախագծի դեմ, ընդհուպ` դատական կարգով։ Այս մասին թատրոնի անձնակազմը հայտարարեց այսօր հրավիրված ասուլիսի ժամանակ։

Ի դեպ, նախարարության նախագծով նախատեսվում է «Գոյ» թատրոնը լուծարել, վարչական մասը կրճատել, իսկ ստեղծագործական կազմը միավորել Գաբրիել Սունդուկյանի անվան ազգային ակադեմիական թատրոնի հետ: Որպես հիմք նախարարությունը նշում է, որ «Գոյ» կենտրոնը 2022թ․ 3 մլն 436 հազար 990 դրամով թերի է կատարել տարեկան ֆինանսական պլանը: Բացի այդ հրավիրված բեմադրիչների կողմից ներկայացումներ չեն բեմադրվել և կենտրոնը չի համագործակցել ԿԳՄՍ նախարարության հետ և այլն:

Ի պատասխան` թատրոնի ստեղծագործական անձնակազմը նամակով դիմել է ԿԳՄՍ նախարարին և բացատրություններ պահանջել։

«Պատմությունը սկսվեց,  երբ քովիդի ժամանակ, որ  կարանտին էր,  փոխնախարարը հանդես եկավ հաղորդմաբ և անվանեց մեզ թոշակառուներ, ինչ է թե՝  մենք ՖԲ-ում  ինչ-որ նյութեր չէինք դնում»,-ասուլիսի ժամանակ ասաց թատրոնի գեղարվեստական ղեկավար Արթուր Սահակյանը։

«Կապիտուլյացիայից հետո դժվար էր գալ թատրոն, երբ կորում է բոլոր հենարաններդ»,-ասում է թատրոնի գեղարվեստական ղեկավարը՝ մանրամասնելով  խնդիրը։