Պարտադրվող նոր կապիտուլյացիային պետք է պատրաստվել դիմագրավել փողոցում․ Քրիստինե Վարդանյան

ԱԺ «Հայաստան» խմբակցության պատգամավոր Քրիստինե Վարդանյանը գրում է.

«Հայաստանի շահերը պաշտպանելու տեղը մնացել են փողոցներն ու հրապարակները

Բրյուսելյան հանդիպումը տեղի ունեցավ և «խաղաղության պայմանագիր» կոչվածի՝ իրականում նոր կապիտուլյացիայի վերաբերյալ կոնկրետ քայլերի մասին պայմանավորվածությունները հրապարակվեցին, երբ Հայաստանում փողոցային պայքարը պասիվացավ։

Բրյուսելյան հանդիպումից հետո պարզ է դառնում՝ ինչու էին տարոնչախոյանները (ամենօրյա ռեժիմով) և թշնամական պետությունների պաշտոնյանները պարբերաբար անդրադառնում շարժմանը՝ որովհետև այն ազդել էր իրենց օրակարգի վրա, ստիպել վերանայել ժամանակացույցը։ Որովհետև փողոց դուրս եկած մարդիկ, փաստորեն, Թուրքիայի և Ադրբեջանի օրակարգին հակազդող և սպառնացող ամենազդեցիկ գործոնն են։

Ստացվում է, որ մենք ընդամենը մեկ քայլ ենք հեռու նպատակից։ Ստացվում է, որ հռչակված վերջնարդյունքը ոչ միայն անիրատեսական չէ, այլև միանգամայն իրագործելի է՝ վկան այդ վտանգը զգացածների արձագանքներն ու շտապողականությունը։

Ուրեմն պարտադրվող նոր կապիտուլյացիային պետք է պատրաստվել դիմագրավել փողոցում»։