Առաջարկվում է գենդերային հավասարության համար նպաստավոր պայմաններ ստեղծել

Աշխատանքի և սոցիալական հարցերի նախարարությունը Իրավական ակտերի հրապարակման միասնական կայքում շրջանառության մեջ է դրել «ՀՀ-ում գենդերային քաղաքականության իրականացման 2019-2023թթ. ռազմավարությունը և միջոցա­ռումների ծրագիրը հաստատելու մասին» որոշման նախագիծը, ըստ որի՝ հասարակական կյանքի բոլոր ոլորտներում գենդերային հավասարության իրացման համար նպաստավոր պայմանների կստեղծվի՝ հաշվի առնելով նաև ՀՀ ստանձնած միջազգային պարտավորությունները: 

Ըստ նախագծի առկա հիմնական խնդիրներ են՝

• օրենսդրության և պետական քաղաքականության մեջ  գենդերային բաղադրիչի բացակայությունը,
• արդարադատության և իրավական բողոքարկման մեխանիզմների ոչ բավարար հասանելիությունը, կանանց առաջխաղացման ազգային մեխանիզմի անարդյունավետությունը,
• հասարակությունում դեռևս պահպանվող  գենդերային հավասարության կարծրատիպերը,
• քաղաքական և հանրային կյանքում կանանց ոչ բավարար մասնակցությունը,
• կանանց ոչ բավարար տնտեսական կարողությունները,
• մշտադիտարկման (մոնիտորինգի) միասնական մոտեցումների բացակայությունը:

Նախագծով առաջարկվում է կարգավորել 5 գերակա ուղղություններ.

1. Սոցիալ-տնտեսական ոլորտում գենդերային խտրականության հաղթահարում, կանանց տնտեսական հնարավորությունների ընդյալնում:
2. Կանանց և տղամարդկանց լիարժեք ու արդյունավետ մասնակցության և հավասար հնարավորությունների ընդյալնում կրթության ու գիտության ոլորտում:
3. Առողջապահության ոլորտում կանանց և տղամարդկանց հավասար հնարավորությունների ընդլայնում:
4. գենդերային խտրականության կանխարգելում:
5. Կանանց առաջխաղացման ազգային մեխանիզմի կատարելագործում, կանանց և տղամարդկանց հավասար մասնակցություն կառավարման ոլորտում և որոշումների ընդունման մակարդակում:

Նախագիծը հարթակում է մինչև հունիսի 6-ը: Մինչև հիմա նախագծին հիմնականում դեմ են քվեարկել: